აზერბაიჯან-სომხეთის საზღვარზე, ფიზულის რაიონის სოფელ ალხანლოში სომხური შეიარაღებული ძალების მიერ მშვიდობიანი მოსახლეობის დახოცვას ქართველი ექსპერტები კაცობრიობის წინააღმდეგ ჩადენილ დანაშაულად აფასებენ.
როგორც „ტერორიზმისა და პოლიტიკური ძალადობის კვლევის ცენტრის“ დირექტორმა ბადრი ნაჭყებიამ აზერბაიჯანულ გამოცემა "apa.az"-ს განუცხადა, ის მწუხარებას გამოთქვამს ტრაგედიის გამო, რასაც ორი ადამიანის, -ქალბატონისა და მისი შვილიშვილის, 2 წლის ბავშვის სიცოცხლე ემსხვერპლა.
"ჩვენ ცალსახად ვაფასებთ ამ ინციდენტს. მსგავსი მოვლენები ნებისმიერ დროს შეიძლება კვლავ განმეორდეს, სანამ კონფლიქტი გადაწყვეტილი არ იქნება"-აცხადებს ექსპერტი.
ბადრი ნაჭყებია აღნიშნავს, რომ მთიანი ყარაბაღის პრობლემა უნდა გადაიჭრას მხოლოდ მშვიდობიანი გზებით, მოლაპარაკების მაგიდასთან, ერთი მთავარი პირობით, რომ აზერბაიჯანის ტერიტორიული მთლიანობა დაცული უნდა იყოს.
"თუ მხარეები მიიღებენ აზერბაიჯანის ტერიტორიული მთლიანობის პრინციპს, მოლაპარაკებები აუცილებლად პოზიტიური მიმართულებით განვითარდება"-აღნიშნავს ნაჭყებია.
ექსპერტი მიიჩნევს, რომ იმ პროვოკაციებით, რომლებსაც სომხეთის შეიარაღებული ძალები ახორციელებენ, შესაძლოა მესამე ძალამ ისარგებლოს.
"განვითარების კომპლექსური პრობლემების კვლევის ცენტრის" ხელმძღვანელი ლევან მეტრეველი ასევე ტრაგედიად აფასებს ფიზულის რაიონის სოფელ ალხანლოში მომხდარ სამხედრო დანაშაულს.
"ამ ფაქტის სხვაგვარად შეფასება შეუძლებელია. მთიანი ყარაბაღის კონფლიქტის ისტორიაში ეს პირველი შემთხვევა არ არის, როცა სომხური მხარე ხანდაზმულებსა და ბავშვებს კლავს. მაგალითისთვის, ყველასთვის კარგადაა ცნობილი ხოჯალის ტრაგედიის შესახებ"-განაცხადა მეტრეველმა.
ექსპერტის აზრით, სომხური მხარის მთავარ მიზანს კონფლიქტის გაჩაღება წარმოადგენს.
"ასეთი პროვოკავციების მიზანია მიაღწიონ კონფლიქტის ესკალაციას. ცნობილია, რომ ბოლო ათი წლის განმავლობაში აზერბაიჯანის ეკონომიკური მაჩვენებლები ხუთჯერ გაიზარდა. ამ დროისთვის, საქართველოსა და აზერბაიჯანის მონაწილეობით ძალიან მნიშვნელოვანი რეგიონული პროექტების რეალიზება ხდება. ამ ვითარებაში, სომხური სამხედრო ძალების დანაშაულებრივი პროვოკაციები, რომ განაახლონ შეიარაღებული კონფლიქტი, მიმართულია არა მხოლოდ აზერბაიჯანის, არამედ საქართველოს ინტერესების წინააღმდეგაც"-მიიჩნევს ექსპერტი.
ლევან მეტრეველი ხაზს უსვამს ფაქტს, რომ აზერბაიჯანში აკრედიტებული უცხო ქვეყნის სამხედრო ატაშეები იმყოფებოდნენ სოფელ ალხანლოში და იქ არცერთი აზერბაიჯანული სამხედრო ობიექტი არ აღმოჩენილა.
"ეს კიდევ ერთხელ აჩვენებს, რომ სროლა განხორციელდა სოფლის მშვიდობიანი მოსახლეობის წინააღმდეგ და საქმე სამხედრო დანაშაულთან გვაქვს.
ალხანლის ტრაგედია წარმოადგენს კაცობრიობის წინააღმდეგ ჩადენილ დანაშაულს და ეს მხოლოდ ჩემი შეფასება არაა. ბევრი ჩემი კოლეგა და ქართველი ხალხის წორედ ასე ფიქრობს. მსგავსი საშინელი მოვლენები, ქართველებმა საკუთარ მიწაზეც გადაიტანა"-აცხადებს ექსპერტი.

http://ru.apa.az/politika-azerbaydjana/nagornyj_karabakh/gruzinskie-eksperty-nazvali-sobytie-v-alkhanly-prestupleniem-protiv-chelovechnosti-opros.html