ჰალიფაქსის საერთაშორისო უსაფრთხოების ფორუმის უფროსი მრჩეველის, რობინ შეპარდის განცხადებით, მოცემულ რეალობაში ყველაზე კარგი ის იქნება, რომ მიხეილ სააკაშვილი აქტიური პოლიტიკისგან გვერდზე გადგეს და სხვა ლიდერის გაზრდაში შეიტანოს წვლილი.

ეს განცხადება პოლიტოლოგმა «Radio Voice of Americaსთან ინტერვიუში გააკეთა.

„ბრიტანულ პოლიტიკაში არის ფრაზა, რომელიც ხშირად გამოიყენება - „დრო პოულობს კაცს“. როცა მარგარეტ ტეთჩერი გახდა დიდი ბრიტანეთის პრემიერი, ფრაზას მოდიფიცირება გავუკეთეთ და ვამბობდით - „დრო პოულობს ქალს“. დრო პოულობს ადამიანს, რომელიც ქვეყანას საკუთარი ბედის განსაზღვრაში კონკრეტულ მომენტში სჭირდება. მიხეილ სააკაშვილმა საქართველოს პოლიტიკაში ძალიან მნიშვნელოვანი როლი ითამაშა, ქვეყნისთვის ძალიან მნიშვნელოვან დროს.

რთულია იმის გადმოცემა, თუ როგორ მოქმედებდა იგი ბოლო რამდენიმე წლის განმავლობაში მის მიმართ უპატივისცემლობის გამოხატვის გარეშე. ჯერ უკრაინელი გახდა, შემდეგ უკრაინელი აღარ იყო... არის თუ არა ისევ ქართველი? ტექნიკურად შეუძლია ისევ გახდეს ქართველი... თუ ჰოლანდიელია? ამაში ჰოლანდიელები არ არიან დარწმუნებული... თუ ბოლომდე ცნობილი არ არის, რომელი ქვეყნის მოქალაქეა ადამიანი, რთულია იცოდე მისი პოზიცია.

ვფიქრობ, მიხეილ სააკაშვილს იგივე სირთულე აქვს გადასალახი, რაც სხვა ლიდერებს ხშირად აქვთ. მათ არ იციან როდის წავიდნენ, ვერ აცნობიერებენ, რომ მიუხედავად იმისა, რომ ქვეყნისთვის კარგი საქმეები აქვთ გაკეთებული, ეს მათ არ აძლევს ავტომატურ უფლებას ქვეყნის პოლიტიკურ ცხოვრებაში მომავალშიც ეკუთვნოდეთ ადგილი. მიხეილ სააკაშვილს საქართველოსთვის პოტენციურად ბევრი კარგი საქმის გაკეთება ჯერ ისევ შეუძლია - ყველაზე კარგი კი ის იქნება, რომ გვერდზე გადგეს და სხვა ლიდერის გაზრდაში შეიტანოს წვლილი“-აცხადებს შეპარდი.

p.s. ინტერვიუს ვრცელი ვერსიის ნახვა შესაძლებელია ბმულზე: www.nsp.ge