საქართველოს არჩეული პრეზიდენტი სალომე ზურაბიშვილი (მისი ინაუგურაცია 16 დეკემბერს გაიმართება) თავის პირველ ოფიციალურ საზღვარგარეთულ ვიზიტს ბრიუსელში განახორციელებს, სადაც ნატოსა და ევროკავშირის ხელმძღვანელებს შეხვდება. ეს ამბავი ცნობილი გახდა ჯეიმს აპატურაის - სამხრეთ კავკასიაში ნატოს გენმდივნის ოფიციალური წარმომადგენლის სალომე ზურაბიშვილთან შეხვედრის შემდეგ“, - იუწყება რუსული გამოცემა «КоммерсантЪ»-ი.

როგორც პუბლიკაციის ავტორი აღნიშნავს, მხარეებმა შეხვედრის დროს განიხილეს შავი ზღვის უსაფრთხოების საკითხები, ისაუბრეს რუსეთის მოქმედებაზე აფხაზეთ/სამხრეთ ოსეთში და ა.შ.

ავტორი ხაზს უსვამს, რომ აშკარაა, ჯეიმს აპატურაი სალომე ზურაბიშვილის პოზიციით კმაყოფილი დარჩა, რასაც ნატოს გენმდივნის წარმომადგენლის განცხადებაც ადასტურებს: „მივესალმები საქართველოს არჩეული პრეზიდენტის გზავნილებს და ყველაფერს ბრიუსელს გადავცემ... მჯერა, რომ ქართველი ხალხი საქართველოში უფრო მეტ ნატოს დაინახავს“.

„ნატო და საქართველო ამჟამად თანამშრომლობის იმ სტადიაში იმყოფებიან, რასაც „ინტენსიური დიალოგი“ ჰქვია“, - წერს ავტორი, - „ინტენსიური დიალოგი“ არის მესამე, ბოლოსწინა მოსამზადებელი სტატია ალიანსში გასაწევრიანებლად. შემდეგი სტადია უკვე „მაპ“-ის მიცემაა, რომლის შემდეგ სახელმწიფო ნატოს წევრი ხდება.. როგორც ცნობილია, საქართველოსთვის მაპ-ის მინიჭება გადაიდო, ნატოს წევრი ზოგიერთი ევროპული ქვეყნის - პირველ რიგში კი გერმანიისა და საფრანგეთის სკეპტიკური პოზიციის გამო. ჯერ კიდევ 2008 წლის აპრილში, „ხუთდღიან ომამდე“ ცოტა ხნით ადრე, ნატოს ბუქარესტის სამიტის ყველა მონაწილემ მხარი დაუჭირა რეზოლუციას, რომლის თანახმად, „საქართველო აუცილებლად გახდება ნატოს წევრი“, მაგრამ დოკუმენტში კონკრეტული ვადები მითითებული არ არის.

2008 წლის აპრილიდან მოყოლებული, ნატოს წარმომადგენლების რიტორიკა არ შეცვლილა“, - აღნიშნავს პუბლიკაციის ავტორი.