საფრანგეთის საერთაშორისო რადიოს (RFI - Radio France Internationale) ტრადიციული მიმოხილვის თემები საქართველოს შესახებ:

ა) საპრეზიდენტო არჩევნების მეორე ტურის წინ „ერთიანი ნაციონალური მოძრაობის“ კანდიდატის გრიგოლ ვაშაძის მოწინააღმდეგეებმა 2007 წლის ნოემბრის ანტისამთავრობო მიტინგის უმოწყალოდ დარბევის მორიგი წლისთავი აღნიშნეს. რუსთაველის გამზირზე, თეატრის წინ ორგანიზებულ აქციაზე სიტყვით გამოსულებმა დაგმეს „ნაციონალური მოძრაობის“ მმართველი რეჟიმის მოქმედება და საქართველოში მცხოვრებ ამომრჩევლებს „ქართული ოცნების“ მიერ მხარდაჭერილი კანდიდატის არჩევისაკენ მოუწოდეს. „გრიგოლ ვაშაძის პრეზიდენტად არჩევა საქართველოში მიხეილ სააკაშვილის დაბრუნების ტოლფასია“, - ასეთი შეფასებები გაისმოდა აქციაზე.

ბ) რუსმა მესაზღვრეებმა კვლავ განაახლეს „ბორდერიზაციის“ პროცესი შიდა ქართლში, ე.წ. „სამხრეთ ოსეთის“ ადმინისტრაციული ხაზის გასწვრივ, ქარელის მუნიციპალიტეტის სოფელ ატოცთან. ინციდენტის ადგილზე ჩავიდნენ როგორც ოპოზიციის წარმომადგენლები, ასევე პრეზიდენტობის კანდიდატი სალომე ზურაბიშვილი მოხდა სკანდალური შეხლა-შემოხლა, რომელსაც თან ახლდა შეურაცმყოფელი გამონათქვამები „ერთიანი ნაცმოძრაობის“ აქტივისტის ლანა ღვინჯილიას მხრიდან სალომე ზურაბიშვილის მისამართით.

მიმომხილველი ესაუბრება პაატა ზაქარეიშვილს, რომელსაც რამდენიმე წლის წინათ შერიგებისა და სამოქალაქო თანასწორობის სახელმწიფო მინისტრის თანამდებობა ჰქონდა დაკავებული. მისი თქმით, საქართველოსა და რუსეთს შორის კონფლიქტი გრძელდება და „ბორდერიზაცია“ მის ერთ-ერთ შემადგენელ კომპონენტს წარმოადგენს. ამჯერად სიტუაციის გამწვავება საპრეზიდენტო არჩევნების პერიოდს დაემთხვა.

გ) რა მიზნით იყო ჩამოსული თბილისში აშშ-ის პრეზიდენტის მრჩეველი ჯონ ბოლტონი? დამკვირვებლები დღემდე ბჭობენ ამ საკითხზე. არის ვარაუდები, რომ ჯონ ბოლტონმა საქართველოს სთხოვა, რომ თბილისის აშშ-ის მიერ გამოცხადებულ ანტიირანულ სანქციებს მიერთდეს, მაგრამ ეს საკმაოდ პრობლემატური მომენტია.

ერთი მხრივ, დღეისათვის საქართველო-ირანს შორის საკმაოდ ფართო ეკონომიკურ-კულტურული კავშირები არსებობს. ვითარდება ორმხრივი ვაჭრობა, ირანელ ტურისტებს ხშირად ნახავთ საქართველოში, რომლის შედეგად ქვეყნის ხაზინა მნიშვნელოვან შემოსავლებს იღებს; მეორე მხრივ, აშშ საქართველოს უმნიშვნელოვანესი სტრატეგიული პარტნიორია, თბილისი ამერიკის სახით დამცველს ხედავს ჩრდილოელი მეზობლის მუქარების ფონზე. მოკლედ, რადგან ირანის საწინააღმდეგოდ მიმართული სანქციების საკითხი დღეს თეთრი სახლის პრიორიტეტებში შედის, საქართველოს მაინც მოწევს თავისი არჩევანის გაკეთება.