„საქართველოში ჩატარებული საპრეზიდენტო არჩევნების პირველ ტურში გამარჯვებული ვერ გამოვლინდა - ამომრჩევლების ხმები გრიგოლ ვაშაძესა („ნაცმოძრაობა“) და სალომე ზურაბიშვილს (დამოუკიდებელი//„ქართული ოცნება“) შორის თითქმის თანაბრად გადანაწილდა. არჩევნების მეორე ტურში მწვავე ბრძოლა გაიმართება არა მარტო თვით კანდიდატებს, არამედ ქვეყნის მთავარ პოლიტიკური ძალებს შორის“, - ნათქვამია აზერბაიჯანული გამოცემის, «Азербайджанские известия»-ს მიერ გამოქვეყნებულ სტატიაში.

საინფორმაციო სააგენტო „ნიუსპრესი“ გთავაზობთ ნატიგ ნაზიმოღლუს ავტორობით გამოქვეყნებული მასალის ქართულენოვან რეზიუმეს:

მასალაში გადმოცემულია საპრეზიდენტო არჩევნების ინტრიგები, განცხადებები, კანდიდატთა მოკლე ბიოგრაფიული მონაცემები, ურთიერთბრალდებები, ელექტორატის უკმაყოფილების მიზეზები, კანდიდატთა დამოკიდებულება ყოფილ პრეზიდენტ მიხეილ სააკაშვილის სამომავლო ბედის მიმართ და ა.შ.

პუბლიკაციაში ყურადღება ეთმობა სალომე ზურაბიშვილისა და გრიგოლ ვაშაძის საგარეოპოლიტიკურ პრიორიტეტებს, განსაკუთრებით რუსეთთან მიმართებით:

„იმ დროს, როცა სალომე ზურაბიშვილი და გრიგოლ ვაშაძე დასავლეთთან (ნატო, ევროკავშირი) ინტეგაციას ერთნაირად მხარს უჭერენ, რუსეთთან დამოკიდებულებაში მათი პოზიციები განსხვავდება. გრიგოლ ვაშაძე და „ნაციონელები“ მოსკოვთან ურთიერთობის ნორმალიზებას გამორიცხავენ მანამ, სანამ რუსეთი საქართველოს აფხაზეთს და სამხრეთ ოსეთს არ დაუბრუნებს, სალომე ზურაბიშვილი სოლიდარულია „ქართული ოცნების“ პოზიციასთან და არ გამორიცხავს რუსეთთან დიალოგის შესაძლებლობას, თუმცა იმავდროულად იგი ეჭვობს, რომ რეალურად სიტუაცია არ გაუმჯობესდება, სანამ აფხაზეთი და სამხრეთ ოსეთს მოსკოვი დამოუკიდებელ სახელმწიფოებად აღიარებს.

ამრიგად, შეიძლება დიდი ალბათობით ითქვას, რომ მეორე ტურში ახალი პრეზიდენტის არჩევის შემდეგ, საქართველოს საგარეო პოლიტიკაში რაიმე მნიშვნელოვანი ცვლილებები არ მოხდება. ეს ეხება საქართველოს სამხრეთკავკასიელ მეზობლებსაც. სალომე ზურაბიშვილმა უკვე განაცხადა, რომ თბილისი გააგრძელებს სტრატეგიულ პარტნიორობას აზერბაიჯანთან. გრიგოლ ვაშაძემაც დაადასტურა, რომ გამარჯვების შემთხვევაში გაგრძელდება „ნაციონალური მოძრაობის“ ტრადიციული პოლიტიკა - ყველაზე მჭიდრო, მეგობრული, სამოკავშირეო ურთიერთობა ჩვენს ქვეყანასთან“, - წერს აზერბაიჯანული გაზეთი.
-----------
«Азербайджанские известия» - აზერბაიჯანის საზოგადოებრივ-პოლიტიკური გაზეთი, იბეჭდება ბაქოში რუსულ ენაზე 2004 წლიდან. ტირაჟი - 8-9 ათასი ეგზ.