საქართველოში გამართული საპრეზიდენტო არჩევნების შედეგების შესახებ იმსჯელეს რუსეთის ტელეარხების საინფორმაციო-ანალიტიკურ პროგრამებში. მაგალითად, ტელეკოპანია «Первый канал»-ის“ პროგრამა «Время»-ში (წამყვანი - ეკატერინა ანდრეევა) გადაიცა ვრცელი ვიდეოსიუჟეტი სათაურით „საქართველო დაძაბულ მოლოდინშია: ჩატარდება მომავალი პრეზიდენტის არჩევნების მეორე ტური“.

სიუჟეტში ხაზგასმულია, რომ ოპოზიციონერებს მეორე ტურში თავიანთი კანდიდატის - გრიგოლ ვაშაძის გამარჯვებაზე ეჭვი არ ეპარებათ.

„გახარებულია მიხეილ სააკაშვილიც, რომელიც ემოციებს ვერ მალავს. იგი კინაღამ ატირდა, როცა ადგილობრივი ტელეკომპანიის ეთერში კომენტარს უკეთებდა არჩევნების პირველი ტურის შედეგებს... სხვათა შორის, სალომე ზურაბიშვილმაც და გრიგოლ ვაშაძემაც საქართველოს მოქალაქეობა მიხეილ სააკაშვილის პრეზიდენტობის დროს მიიღეს. ორივე სწორედ მისი პრეზიდენტობის დროს იყვენენ საგარეო საქმეთა მინისტრები“-ნათქვამია სიუჟეტში.