ირანული «Pars Today»-ს მიერ გამოქვეყნებულ სტატიაში მიმოხილული და გაანალიზებულია აშშ-ის პრეზიდენტის მრჩევლის ჯონ ბოლტონის ვიზიტი რუსეთში, აზერბაიჯანში, სომხეთსა და საქართველოში. ცხადია, განსაკუთრებული ყურადღება დათმობილი აქვს ამერიკელი ემისრის ყოფნას და შეხვედრებს ბაქოში, ერევანსა და თბილისში.

„სამხრეთ კავკასია ისეთი რეგიონია, რომლის სტრატეგიული მნიშვნელობისთვის ამერიკელ ჩინოვნიკებს არაერთხელ გაუსვიათ ხაზი. ისინი მუდმივად აკეთებენ აქცენტს ამ რეგიონის სამ სახელმწიფოსთან ურთიერთობის განვითარებაზე. ახლახან დონალდ ტრამპის მრჩეველი ეროვნული უსაფრთხოების საკითხებში ჯონ ბოლტონი ბაქოში, ერევანსა და თბილისში იმყოფებოდა. მისი ვიზიტის ძირითადი მიზანი იყო ვაშინგტონის თეირანთან დაპირისპირების ფონზე გაეფრთხილებინა ირანის ჩრდილოელი მეზობლები და რომ დაერწმუნებინა ისინი ირანის ისლამურ რესპუბლიკასთან ურთიერთობის შეზღუდვაზე.

თუმცა, როგორც ჩანს, ჯონ ბოლტონმა თავის მიზანს სრულად ვერ მიაღწია: მას სურდა, რომ აზერბაიჯანს და სომხეთს ირანთან საზღვრები დაეხურათ, მაგრამ იგი აშშ-ში ხელცარიელი წავიდა. საქართველოში შეხვედრების დროსაც ჯონ ბოლტონმა ყურადღება დაუთმო როგორც რეგიონულ უსაფრთხოებას, ასე აშშ-საქართველოს კავშირებს.

ზოგადად, სამხრეთ კავკასიის ქვეყნებს მშვენივრად ესმით ირანის ისლამური რესპუბლიკის როლი ამ რეგიონში და მხედველობაში იღებენ ირანთან არსებული ფართო სავაჭრო, ეკონომიკურ და ენერგეტიკულ კავშირებს, აგრეთვე თეირანის კონსტრუქციულ და პოზიტიურ როლს სამხრეთ კავკასიაში მშვიდობისა და უსაფრთხოების განმტკიცების საქმეში. სწორედ ამიტომ, აშკარაა, რომ ისინი თავიანთ ეროვნულ ინტერესებს ვაშინგტონის უკანონო მიზნებს და ზრახვებს არ შეწირავენ.