სომხური გამოცემის, «Республика Армения»-ს მიერ გამოქვეყნებულ სტატიაში გაანალიზებულია ეროვნული უსაფრთხოების საკითხებში აშშ-ის პრეზიდენტის მრჩევლის ჯონ ბოლტონის ვიზიტის მიზნები რუსეთში და სამხრეთ კავკასიის სახელმწიფოებში.

საინფორმაციო სააგენტო „ნიუსპრესი“ გთავაზობთ ამონარიდს სტატიიდან:

„ირანის თემა ჯონ ბოლტონის მოლაპარაკების ერთ-ერთი მნიშვნელოვანი საკითხი იქნება აზერბაიჯანის, სომხეთისა და საქართველოს ხელისუფლებასთან. ექსპერტები თვლიან, რომ აშშ-ის პრეზიდენტის მრჩეველს სურს უფრო დეტალური პასუხი მიიღოს სამხრეთ კავკასიის ქვეყნებისაგან ირანის მიმართ მათ პოზიციასთან დაკავშირებით. ერთ-ერთი რუსი სამხედრო მიმომხილველის ალექსანდრე ხროლენკოს აზრით, ვაშინგტონი ახლო აღმოსავლეთში პოზიციებს კარგავს და ასეთ სიტუაციაში ჯონ ბოლტონი ცდილობს უფრო აქტიურად გამოიყენოს სამხრეთ კავკასიის ქვეყნები რუსეთის, ირანის, თურქეთისა და სირიის წინააღმდეგ.

აზერბაიჯანი ირანს და რუსეთს ესაზღვრება და იმავდროულად აშშ-ის მნიშვნელოვან პარტნიორად ითვლება სამხრეთ კავკასიაში. ამერიკა დაინტერესებულია ბაქო-თბილისი-ყარსის რკინიგზით, რომელიც ცენტრალური აზიის ქვეყნებისათვის ახალ პერსპექტივებს აჩენს - ამ სატრანსპორტო მაგისტრალის მეშვეობით შეიძლება ტვირთები ავღანეთში იქნეს გადაზიდული. გარდა ამისა, ევროპაში დაწყებული „გაზის ომის“ ფონზე ვაშინგტონი სულ უფრო მეტ ყურადღებას აქცევს აზერბაიჯანის გაზის პროექტებს: ბაქო და თეირანი ხომ მოსკოვთან ერთად საერთაშორისო სატრანსპორტო დერეფან „ჩრდილოეთ-სამხრეთის“ მშენებლობითაა დაკავებული, რომლის მეშვეობით ინდოეთიდან და სპარსეთის ყურედან ტვირთები რუსეთში და ჩრდილოეთ ევროპაში იაფად და სწრაფად გადაიზიდება.

რაც შეეხება საქართველოს, ვაშინგტონი თბილისს ნატოში გაწევრიანებას პირდება, ეხმარება არმიის გაძლიერებაში. ამერიკას ასევე შეუძლია საქართველოსთან თანამშრომლობა შავი ზღვის აკვატორიაში თავისი სამხედრო ხომალდების შესაყვანად გამოიყენოს - ირანის დასამუქრებლად, სამხედრო ობიექტებისათვის მასირებული სარაკეტო დარტყმის მიყენების მიზნით: საქართველოს შავი ზღვის სანაპიროდან ირანის დედაქალაქამდე ხომ პირდაპირი ხაზით 1000 კილომეტრია... თუმცა ირანი, თავის მხრივ, საქართველოს ტერიტორიასაც მიწვდება საპასუხო დარტყმისათვის.


გასაგებია, რომ აზერბაიჯანს და თურქეთს სომხეთ-ირანის კავშირების ბლოკირება სურთ. სომხეთი ირანისათვის ევრაზიულ ეკონომიკურ კავშირთან დამაკავშირებელი რგოლია. როგორ უყურებს დღეს ამერიკა ირან-სომხეთის კავშირებს? ვაშინგტონი ადრე ყოველთვის გაგებით ეკიდებოდა ერევან-თეირანის ურთიერთობას და განა ერევანს ახლა რთულ სიტუაციაში ჩააყენებს ირანის წინააღმდეგ მიმართული მოთხოვნებით?