„უკრაინის მართლმადიდებელ ეკლესიის (კიევის საპატრიარქო) მეთაურმა ფილარეტმა, აშშ-ში ყოფნისას, განაცხადა, რომ საქართველოს მართლმადიდებელმა ეკლესიამ უკრაინის ეკლესიის ავტოკეფალია უნდა აღიაროსო. ამასთან, ქართული ეკლესია არ ჩქარობს ამ საკითხში კიევის მხარდაჭერას, რადგან შიშობს - უკრაინის შემდეგ კონსტანტინოპოლმა ავტოკეფალია ვაითუ აფხაზეთის ეკლესიასაც მისცესო“, - ნათქვამია რუსული გამოცემის, «КоммерсантЪ»-ის მიერ გამოქვეყნებული სტატიის დასაწყისში.

ფილარეტი აშშ-ში ატალნატიკური საბჭოს სხდომაზე გამოვიდა და საქართველოს კათოლიკოს-პატრიარქს ილია მეორეს უკრაინის ეკლესიის ავტოკეფალიის აღიარებისაკენ მოუწოდა: „საქართველო და უკრაინა ორივე რუსეთის აგრესიისაგან დაზარალდნენ, - თქვა მან, - ამიტომ სწორედ საქართველომ უნდა დაგვიჭიროს მხარი. ჩვენ მართლმადიდებლები ვართ, ამიტომ ვალდებულები ვართ ორივემ ერთად ვილოცოთ ამისათვის“.

საქართველოს მართლმადიდებელი ეკლესიის უმაღლესი პირები, მართალია, პირდაპირ არ ამბობენ, მაგრამ მიანიშნებენ: საქართველო არ ცქარობს უკრაინის ეკლესიის ავტოკეფალიის აღიარებას. მთავარი მიზეზი ისაა, რომ „უკრაინის პრეცედენტი“ აფხაზეთს ანალოგიურ აღიარებაში დაეხმარება კონსტანტინოპოლის საპატრიარქოსაგან.

როგორც ცნობილია, მსოფლიო პატრიარქი ბართლომე I ჯერ კიდევ 2012 წელს შეხვდა აფხაზეთის არაკანონიკური მიტროპოლიის ხელმძღვანელს დოროფეი დბარს, რომელიც დამოუკიდებლობას ითხოვს როგორც რუსული, ასევე ქართული ეკლესიისაგან. ბართლომემ მას დახმარება აღუთქვა. მას შემდეგ, რაც კონსტანტინოპოლის მსოფლიო საპატრიარქომ უკრაინული ეკლესიას აღიარების გეგმები გამოაცხადა, დოროთეი დბარმა აღნიშნა, რომ ამ საკითხის გადაწყვეტა დააჩქარებს აფხაზეთის ეკლესიის საკითხის გადაწყვეტასაც: „უკრაინისა და მაკედონიის კვალდაკვალ აფხაზეთის რიგიც დადგება“. თუმცა დღის წესრიგიდან არ მოხსნილა ახალი ათონის მონასტრის კუთვნილების საკითხი: რუსეთის მართლმადიდებელი ეკლესია (მოსკოვის საპატრიარქო) აფხაზეთის მიტროპოლიისაგან ამ მონასტრის გადაცემას მოითხოვს, მაგრამ მიტროპოლიამ, ავტოკეფალიის აღიარებამდე, ახალი ათონის მონასტერი თავის მთავარ საკათედრო ტაძრად გამოაცხადა.