„სამხრეთ კავკასიელ მეზობლებს ერთმანეთთან რთული ურთიერთობა აქვთ. ეს ფაქტი ევროპისთვის პრობლემაა, რუსეთისთვის კი - გავლენის განხორციელების შანსი. ანგელა მერკელმა სამი დღე გაატარა რუსეთის „წინა ეზოში“, რომელიც მოსკოვის ინტერესების ობიექტად ითვლება და იქ მდებარე სამივე სახელმწიფო - საქართველო, სომხეთი და აზერბაიჯანი - დაარწმუნა, რომ ევროპა მათზე ფიქრობს და ზრუნავს. რა თქმა უნდა, ამაში უპირველესად რეგიონის უსაფრთხოება და სტაბილურობა იგულისხმება, რასაც სამივე ქვეყანა იზიარებს“-ასე იწყება გავლენიანი გერმანული «Deutsche Welle»-ს მიერ მიქაელა კიუფნერის ავტორობით გამოქვეყნებული სტატია, რომლის მცირედ შემოკლებულ ქართულენოვან ვერსიას საინფორმაციო სააგენტო „ნიუსპრესი“ გთავაზობთ:

სამხრეთ კავკასიაში, გეოსტრაგიული თვალსაზრისით, არცერთი ქვეყანა ისე არ გრძნობს თავს ბედის ანაბარად მიტოვებულად და დავიწყებულად, როგორც საქართველო. სტუდენტებთან საუბრის დროს თბილისში ახალგაზრდებს მოთმინებამ უღალატა და გერმანიის კანცლერს პირდაპირ ჰკითხეს - როდის მიიღებთ საქართველოს ევროკავშირისა და ნატოს სრულუფლებიან წევრადო. ბოლოს და ბოლოს, თბილისმა ხომ ყველა „დავალება შეასრულა“ როგორც ეკონომიკის სფეროში, ასევე კორუფციასთან ბრძოლაში. გარდა ამისა, ქართველი სამხედრო მოსამსახურეები ავღანეთში ნატოს წევრების მხარდამხარ იბრძვიან. სტუდენტებმა ანგელა მერკელს „თავისუფალი სამყაროს ერთ-ერთი ლიდერი“ უწოდეს და აღნიშნეს, რომ მისგან ბევრის მოლოდინი აქვთ.

პრემიერ-მინისტრ მამუკა ბახტაძისათვის კი ყველაფერი გასაგებია. მისთვის არ ყოფილა მოულოდნელი ის, რაც ანგელა მერკელმა ჯერ კიდევ ვიზიტის დასაწყისშივე განაცხადა: ევროკავშირთან ასოცირებისა და თავისუფალი ვაჭრობის შეთანხმების დადების, აგრეთვე ლიბერალური სავიზო რეჟიმის დაწესების შემდეგ საქართველოს უახლოეს ხანში ნატოში გაწევრიანების იმედი არ უნდა ჰქონდეს. ალიანსში მიღების ნაცვლად გერმანია საქართველოსთან ორმხრივ ურთიერთობას გააღრმავებს და მას ეკონომიკის განვითარებაში დაეხმარება. აშკარაა, რომ ისეთ „სანიმუშო მოსწავლესთვისაც“ კი, როგორიც საქართველოა, დასავლეთის მხრიდან გაწეულ მხარდაჭერას უხილავი საზღვარი მაინც აქვს.

მიუხედავად იმისა, რომ ზოგიერთი სტუდენტმა გერმანიის კანცლერს უსაყვედურა - რატომ არ ამბობთ სიტყვა „ოკუპაციას“, როცა ქვეყნის ტერიტორიის 20% ოკუპირებულიაო, იმ ფაქტის გამო, რომ ანგელა მერკელმა „სამხრეთ ოსეთთან“ არსებული სრულიად რეალური დე-ფაქტო საზღვარი მოინახულა, საქართველო ამისთვისაც მადლობელი დარჩა.