"ანგელა მერკელი ბინოკლით მიზანმიმართულად იყურება - ცოტათი წელში მოხრილია, რომ მოპირდაპირე მხარე უკეთ დაინახოს. ყველაფერი მშვიდად გამოიყურება - მთები, ტყეები... მაგრამ ეს მხოლოდ ერთი შეხედვით: აქ, თბილისიდან 50 კილომეტრზე, პატარა სოფელ ოძისთან, სადაც საქართველოს განდგომილ რეგიონთან - სამხრეთ ოსეთთან გამმიჯნავი სადემარკაციო ხაზი გადის, ომმა შეიძლება ყოველ წუთს იფეთქოს და მასში მთელი კონტინენტები ჩაითრიოს. ქართველებსა და ოსებს შორის კონფლიქტს ასი წლის ისტორია აქვს"-ასე იწყება გერმანული გამოცემის, «Bild»-ის მიერ რალფ შულერის ავტორობით გამოქვეყნებული სტატია, რომლიც მცირედ შემოკლებულ, ქართულენოვან ვერსიას საინფორმაციო სააგენტო "ნიუსპრესი" გთავაზობთ:

საბჭოთა კავშირის დაშლის შემდეგ რუსეთმა პოსტსაბჭოთა რესპუბლიკებს აჩვენა, რომ მართალია ისინი დამოუკიდებელნი გახდნენ, მაგრამ მაინც მოსკოვის გავლენის ქვეშ იმყოფებიან. რუსეთს ასეთი დამოკიდებულება აქვს საქართველოსთან, მოლდოვასთან, უკრაინასთან... თითქმის ყველგან ერთიდაიგივე სურათია: სეპარატისტები რუსეთს დახმარებას სთხოვენ და რუსეთიც ეხმარება: სამხრეთ ოსეთში დღეს რუსეთის სამხედრო ბაზაა, სადაც 4500 ჯარისკაცი მსახურობს.

სანამ ანგელა მერკელი ათასჯერადი გადიდების მქონე ბინოკლით რუსულ სამხედრო ბაზას უყურებს, ჟენევაში სამხრეთ ოსეთისა და კიდევ ერთი განდგომილის - აფხაზეთის სტატუსის შესახებ მოლაპარაკება მიმდინარეობს. მათი „დამოუკიდებლობა“ მხოლოდ რამდენიმე სახელმწიფომ აღიარა. ორივე „რესპუბლიკა“ ცდილობს საზღვრები დააფიქსიროს. ქართული მხარე ამ პროცესს მიუღებლად თვლის. არის ე.წ. სადაო ადგილები, რომელთა კუთვნილება გადაწყვეტილი არ არის. ხდება ინციდენტები, ადგილობრივი მოსახლეობა ზარალდება. სადემარკაციო-ადმინისტრაციულ ხაზს ქართული მხრიდან ევროკავშირის 220-წევრიანი სადამკვირვებლო მისია აკონტროლებს. ქართული და რუსული მხარეების შტაბ-ბინებს შორის „ცხელი ხაზით“ კავშირი წითელი ტელეფონის მეშვეობით ხდება.

ანგელა მერკელს ჯავშნიანი ავტომობილიდან მისიის ყველგანმავალში გადაჯდომა მოუწია, რათა მოპირდაპირე მხარე ქართული ოფიციალური ნომრებით არ გაღიზიანებულიყო. სიფრთხილის წესები დაცულია, თუმცა მაინც არის იმის შიში, რომ სამხრეთ კავკასია შეიძლება დიდი სახელმწიფოეს შორის კონფლიქტის კერა გახდეს. „ჩვენ ყოველთვის ველოდებით სამხრეთ ოსეთში კონფლიქტის დაწყებას, როცა ვლადიმერ პუტინს რუსეთის საშინაო პოლიტიკაში სიტუაცია ურთულდება“, - ამბობს ერთ-ერთი ქართველი ექსპერტი.

სამხრეთ ოსეთში, რომელსაც რუსეთთან მხოლოდ როკის გვირაბით აქვს კავშირი, სიტუაცია სულ უფრო უარესდება. საქართველო ოსებს სამედიცინო დახმარებას სთავაზობს, რასაც სადამკვირვებლო მისიის წევრებიც მხარს უჭერენ. რაც შეეხება სამხედრო მიზნებს, საქართველოს იმის შესაძლებლობა არ აქვს, რომ რუსეთთან კონფლიქტი ისევ დაიწყოს.

საქართველოს ნატოში გაწევრიანების საკითხი ჯერ-ჯერობით არ განიხილება, თუმცა ამერიკის შეერთებულ შტატებს რეგიონში ჯარების მასობრივი გადასროლა შეუძლია. გერმანიის დელეგაციის ერთ-ერთი წევრის აზრით, საქართველოში, კონფლიქტის ზონაში ერთმანეთს ორი ბირთვული სახელმწიფო - რუსეთი და აშშ უპირისპირდება. არავინ იცის, თუ რომელი როდის რას გადაწყვეტს - შეტევას თუ უკან დახევას. აქ ცივი ომი ჯერ კიდევ გრძელდება.

საქართველო ცდილობს რუსეთთან სიტუაციის გამწვავება არ მოხდეს. ორ მეზობელს შორის ურთიერთობები თანდათან ვითარდება, იზრდება რუსი ტურისტების რაოდენობა, ღრმავდება ვაჭრობა. საქართველოს მთავრობა იმედოვნებს: თუ თბილისი წყნარად იქნება და მკვეთრ მოძრაობებს არ გააკეთებს, ვლადიმერ პუტინი საქართველოსკენ არ გამოიხედავს.

„საზღვარზე“ კანცლერის ყოფნის დროს რაიმე საეჭვო არაფერი მომხდარა: ირგვლივ ჭრიჭინების „მღერა“ ისმოდა, დელეგაციით მხოლოდ ერთი ძაღლი დაინტერესდა, რომელმაც დაცვას შეხედა და გაერიდა. ბავშვები გზის ორივე მხარეს ავტომობილების კოლონას ხელს უქნევდა. ევროკავშირის დამკვირვებლები კმაყოფილები დარჩნენ.