აზერბაიჯანული გამოცემის, «Новое время»-ს მიერ გამოქვეყნებული სტატია ეხება გერმანიის კანცლერის ანგელა მერკელის დაგეგმილ ვიზიტებს სამხრეთ კავკასიის სახელმწიფოებში - საქართველოში (23 აგვისტოს), სომხეთში (24 აგვისტოს) და აზერბაიჯანში (25 აგვისტოს).

საინფორმაციო სააგენტო "ნიუსპრესი" გთავაზობთ ამონარიდს პუბლიკაციიდან:

„ევროპის კავშირის სივრცითი რეფორმირების პრიორიტეტული მიმართულება, მისი განვითარების ახალ ეტაპზე, აღმოსავლეთით გაფართოება გახდა. ამასთან დაკავშირებით აუცილებელია ღრმად გაანალიზდეს ევროკავშირის თანამედროვე გეოპოლიტიკური და ეკონომიკური სტრატეგია სამხრეთ კავკასიის ქვეყნების მიმართ და შეფასდეს ევროკავშირის გაფართოების შედეგი ამ რეგიონის ქვეყნების ეკონომიკური ინტერესებისათვის.

კავკასია, რომელიც არცთუ ისე დიდი ხნის წინათ, მხოლოდ ერთი სახელმწიფოს - საბჭოთა კავშირის ერთიან პოლიტიკურ სივრცეში შედიოდა, დღეს სხვადასხვა ქვეყნების გეოპოლიტიკური და ეკონომიკური ინტერესების ურთიერთქმედების არენად იქცა. აზიისა და ევროპის შეპირაპირების ადგილზე მდებარე კავკასია ერთობ მოხერხებულ პლაცდარმს წარმოადგენს როგორც შუა და ახლო აღმოსავლეთში, ასევე შავი და კასპიის ზღვების აუზში შეღწევასა და შემდგომი წინსვლისათვის.

ევროპის ძირითადი სახელმწიფო გერმანიაა, რომელიც ევროკავშირის ლოკომოტივს წარმოადგენს... და რადგანაც ჩვენთან თვით ფრაუ ანგელა მერკელი ჩამოდის, ეს ნიშნავს, რომ კავკასიის რეგიონისადმი მრავალი ქვეყნის გეოპოლიტიკური ინტერესი გაძლიერდება.

თუ ევროპისა და ამერიკის შეერთებულ შტატებს შორის მიმდინარე წინააღმდეგობრივ პროცესებს გავითვალისწინებთ, შეგვიძლია ვთქვათ, რომ გერმანია, როგორც ევროკავშირის ყველაზე მთავარი და ეკონომიკურად უძლიერესი სახელმწიფო, სამხრეთ კავკასიაში თავისი გეოპოლიტიკური პარტიის გათამაშებას იწყებს. მით უმეტეს, რომ ევროკავშირის ეგიდით არსებულმა „აღმოსავლეთის პარტნიორობის“ პროგრამამ თავისი შესაძლებლობები უკვე დიდი ხნის წინ ამოწურა. ამიტომაც აუცილებელია აღიარდეს ამ იდეის ჩავარდნა და მასზე უარი ითქვას.

კავკასიასთან მიმართებით ორი გეოპოლიტიკური სტრატეგიის - ევრაზიულისა და ევროატლანტიკურის - ერთდროულად განხორციელება ვერ მოხერხდება, რადგან ისინი ერთმანეთს გამორიცხავენ, ერთმანეთს ეწინააღმდეგებიან. აქ, როგორც ჭადრაკში, არ შეიძლება ერთდროულად ითამაშო „თეთრებისთვისაც“ და „შავებისთვისაც“. ამიტომაც სამხრეთ კავკასიის რესპუბლიკებს არჩევანის საკმაო თავისუფლება აქვთ.

სრულიად აშკარაა, რომ არცერთი სამხრეთკავკასიური სახელმწიფო არ ფლობს საკმარის გეოპოლიტიკურ პოტენციალს, რომ ახალ პირობებში თავის საკუთარი თამაშის წამოწყების პრეტენზია ჰქონდეს. თამაშის წესები ჩვენგან დამოუკიდებლად უკვე დიდი ხანია დადგენილია. შესაბამისად, ჩვენ მხოლოდ ბანაკის ამორჩევისა და რომელიმე სტრატეგიაში მონაწილეობის უფლება გვრჩება. სწორედ ამაში გამოიხატება გეოპოლიტიკური თავისუფლება მკაცრად განსაზღვრულ ჩარჩოებში," - წერს სტატიის ავტორი რ.ველიევი.