ტელეკომპანია EuroNews აგრძელებს რეპორტაჟებს საქართველოდან და მაყურებელს ქვეყნის ტურისტულ ღირშესანიშნაობებს აცნობს.

საინფორმაციო სააგენტო „ნიუსპრესი“ გთავაზობთ ტელეჟურნალისტ კლაუდიო როსმინოს მორიგი რეპორტაჟის ტექსტურ ვერსიას, რომელიც საქართველოს მღვიმეებს - კარსტულ გამოქვაბულებს ეხება:

„ყუმისთავი დასავლეთ საქართველოში, ქუთაისიდან 20 კილომეტრში მდებარეობს და ქვეყნის ყველაზე საოცარ მღვიმედ ითვლება. გამოქვაბულთა ამ უზარმაზარი კომპლექსის უმცროს დად შეიძლება სათაფლიის მღვიმე ჩავთვალოთ, რომელშიც დინოზავრის კვალია შემონახული. მაგრამ ყველაზე ლამაზი მაინც პრომეთეს მღვიმეა: აქ თქვენ დატკბებით სტალაქტიტების, სტალაგმიტების, გაქვავებული „ჩანჩქერებით“ და მიწისქვეშა მდინარეებით. მღვიმეთა ლაბირინთი მიწისქვეშ ათეულ კილომეტრებზე გრძელდება. აბა, წარმოიდგინეთ: ეს კედლები 60 მილიონი წლის წინათ ჩამოყალიბდა!

ამჟამად ტურისტებისათვის გახსნილია ერთი კმ. სიგრძის მქონე ფართო დერეფანი, რომელიც 1984 წელს, როცა აღმოაჩინეს, მხოლოდ ძალიან ვიწრო გასასვლელს წარმოადგენდა.

ამირან ჯამრიშვილი, სპელეოლოგი: „მთლიანად ტალახით ვიყავით მოსვრილნი, როცა ამ დიდ მიწისქვეშა დარბაზში შემოვედით. ჩვენს სიხარულს საზღვარი არ ჰქონდა. გარეთ გასვლას მოუთმენლად ველოდებოდით, რომ სხვა სპელეოლოგებისათვის სიხარული გაგვეზიარებინა“.

პრომეთეს მღვიმის დათვალიერების ერთ-ერთი შთამბეჭდავია მომენტია მიწისქვეშა მდინარეში ნავით გასეირნება, რომლის მეშვეობით თქვენ გარესამყაროში დაბრუნდებით“, - ამბობს კლაუდიო როსმინო.