ევროპული სამაუწყებლო ტელეკომპანია EuroNews-მა (მთავარი ოფისი - ლიონში, საფრანგეთი) ეთერში გადასცა სიუჟეტი საქართველოში ტურიზმის მდგომარეობის შესახებ, კერძოდ კი - გუდაურის სამთო-სათხილამურო კურორტის თაობაზე.

საინფორმაციო სააგენტო "ნიუსპრესი" გთავაზობთ დენის ლოკტევის ავტორობით მომზადებული სიუჟეტის ტექსტურ ვერსიას ქართულ ენაზე:

„დიდი კავკასიონი - ევროპის მთათა სისტემაში ყველაზე მაღალ ქედს წარმოადგენს. ახლა, აპრილის ბოლოს, ჩვენ გუდაურში ვიმყოფებით, რომელიც საქართველოში ყველაზე ცნობილი და პოპულარული სამთო კურორტია. აქ სათხილამურო ტრასები 3 ათას მეტრზე იწყება, ტურისტული სეზონი კი დეკემბრიდან აპრილის ბოლო რიცხვებამდე გრძელდება. გუდაური განთქმულია თოვლის ხარისხით, ხოლო მის ინფრასტრუქტურას რესპუბლიკაში ანალოგი არ აქვს. ნინო ტყავაძე აქ რეგულარულად ჩამოდის: „გუდაური საქართველოს განთქმული სამთო-სათხილამურო კურორტია. ახლოა თბილისთან, რაც კომფორტულობას მატებს. ვფიქრობ, მას განვითარების დიდი პოტენციალი აქვს, აქაური მთების მონაცემების გათვალისწინებით“, - ამბობს იგი.
თბილისიდან გუდაურში ამოსვლა სულ რაღაც ორი საათის განმავლობაში შეიძლება. გუდაურში არსებული ტრასების საერთო სიგრძე 70 კილომეტრს აღწევს. აქ არის უდიდესი შესაძლებლობები ფრირაიდის მოყვარულებისათვის და ექსტრიმი ყველაზე გაბედული ტურისტებისთვის“, - აღნიშნულია მასალაში.
--------
«EuroNews»-ის ეთერში გადაცემული კიდევ ერთი ვიდეოსიუჟეტი საქართველოს "შავიზღვისპირეთის მარგალიტს" - აჭარას და ბათუმს ეძღვნება. „ბათუმის ცაში, არგონავტთა ნაკვალევზე“, - ასეთი სათაური აქვს ვიდეოსიუჟეტს, რომელშიც ნათქვამია:

„ბათუმი აჭარის ადმინისტრაციული ცენტრია, საქართველოს ერთ-ერთი დიდი ქალაქი, ქვეყნის ყველაზე პოპულარული შავიზღვისპირა კურორტი და ნავსადგური. საბაგირო გზა „არგოს“ მეშვეობით ანურიას მთაზე ახვალთ, ზღვის დონიდან 2500 მეტრ სიმაღლეზე. აქედან თქვენ ბათუმის თვალწარმტაცი ხედით დატკბებით.

ბათუმი პირველად ჩვენს ერამდე მე-4 საუკუნეში მოიხსენიება. მისი ისტორია მჭიდროდაა დაკავშირებული ძველ ბერძნულ მითებთან იაზონისა და არგონავტების შესახებ. დღეს ბათუმი დინამიურად განვითარებული ტურიზმის, გართობისა და ვაჭრობის ცენტრია, რომელსაც შესანიშნავი პერსპექტივა აქვს.

ბათუმელი ლია ფუტკარაძის თქმით, „საბაგირო გზა ბათუმის დათვალიერების კარგი საშუალებაა, საიდანაც მთები და შავი ზღვა მოჩანს“.

ქალაქის პანორამით რომ დატკბებით, მთიდან დაშვებას ნუ იჩქარებთ: იქ თქვენ მრავალი გასართობი გელოდებათ, ცოცხალი სიმღერები, მუსიკა და ქართული ეროვნული სამზარეულოს საუკეთესო კერძები“, - აღნიშნავს დენის ლოკტევი“.

წყარო: http://ru.euronews.com/2018/05/07/batumi-adventures