ცნობილი გერმანული გამოცემა „შპიგელი“ მკითხველებს საქართველოს მოქალაქეების მიერ უვიზო რეჟიმის პირობების დარღვევის ფაქტებს აცნობს, კერძოდ, სტატიაში საუბარია თავშესაფრის მიღების თხოვნების უჩვეულო ზრდა გერმანიაში უვიზო რეჟიმის მეშვეობით ჩასული ქართველებისაგან. იგივე ტენდენცია შეინიშნება ევროპის სხვა სახელმწიფოებშიც.

როგორც „შპიგელი აღნიშნავს, ეს მოვლენა, რასაკვირველია, არასასიამოვნოა, რადგან სწორედ ამას უფრთხოდა ევროკავშირი, როცა საქართველოსთვის უვიზო რეჟიმს აწესებდა. ცხადია, თუ ტენდენცია გაგრძელდება, ბრიუსელი, ალბათ, ვიზალიბერალიზების შეჩერების ან საერთოდ, მისი გაუქმების მექანიზმს აამოქმედებს.

რა თქმა უნდა, გერმანიის ხელისუფლება ცდილობს, რომ ყოველმხრივ შეისწავლოს თავშესაფრის მთხოვნელი საქართველოს მოქალაქეების მიერ წარდგენილი არგუმენტები და ობიექტურად გადაწყვიტოს საკითხი. შედეგები ასეთია: 2017 წელს თავშესაფრის მიღების 6340 მსურველიდან მხოლოდ 130 დაკმაყოფილდა. პრინციპში, ეს რაოდენობა 2%-იან ქვოტას შეესაბამება. „ევროკომისია ამ პრობლემის შესახებ უკვე საქმის კურსშია ჩაყენებული, მაგრამ მას სურს, რომ უვიზო რეჟიმის დარღვევები საქართველოს მთავრობასთან თანამშრომლობით გადაწყვიტოს. იმედი გვაქვს, რომ უახლოეს დროში კონკრეტულ შედეგებს ვიხილავთ“, - წერს „შპიგელი“ და გერმანიის კომპეტენტური სტრუქტურების განცხადებას იმოწმებს.

თავის მხრივ, ევროკავშირი მიიჩნევს, რომ საქართველოს მთავრობის მიერ დაწყებული კამპანია, რომელიც გერმანიაში (და, რასაკვირველია ევროპის სხვა ქვეყნებში) თავშესაფრის მიღების უპერსპექტივობის განმარტებას ითვალისწინებს, [გარკვეულ დადებით შედეგს გამოიღებს]. ამასთან, გერმანიის შინაგან საქმეტა სამინისტროს ინიციატივით უკვე უახლოეს ხანში განხორციელდება საქართველოს კლასიფიცირება „უსაფრთხო ქვეყნად“. ამგვარი ძალისხმევა მნიშვნელოვნად გააიოლებს უვიზო რეჟიმის პირობების დამრღვევ იმიგრანტთა დეპორტაციას.

ექსპერტების აზრით, ბევრი ქართველი, თავშესაფრის მიღების მცირე პერსპექტივის მიუხედავად, მაინც ჩადის ევროპაში, უმთავრესად იმ მიზეზით, რომ საქართველოში უმუშევრობის მაღალი დონე და უკიდურესი სიღარიბეა გამაფებული. საქართველოს მშპ (ანუ მთლიანი შიდა პროდუქტი) ერთ სულ მოსახლეზე თვეში, ბოლო მონაცემებით, მხოლოდ 280 ევროს შეადგენს. შედარებისთვის: გერმანიაში კი, 2017 წლის მიხედვით, 3300 ევრო იყო.