ბელარუსული გამოცემა «Салidарнасць», საქართველოში პრეზიდენტ ალექსანდრე ლუკაშენკოს ვიზიტს ეხმაურება.
საინფორმაციო სააგენტო "ნიუსპრესი" გთავაზობთ პეტრ ჰაიდუკის ავტორობით გამოქვეყნებული მასალის ქართულენოვან ვერსიას:
ქართველებმა თბილისში მყოფ ალექსანდრე ლუკაშენკოსაგან ბელარუს-საქართველოს ეკონომიკური განვითარების საკითხზე მოულოდნელი განცხადება მოისმინეს: „ნამდვილად არ მეგონა, რომ ჩვენი ქართველი კოლეგები ასე იმუშავებდნენ. გულწრფელად ვაღიარებ, ამას არ მოველოდი. ამიტომაც ყოველგვარი პირფერობის გარეშე ვამბობ: თქვენ მე სასიამოვნოდ გამაკვირვეთ. ძალიან მაგრები ყოფილხართ და დიდი მომავალი გაქვთ“.
რა ვერ დაინახეს ჩვენმა ეკონომისტებმა ისეთი, რაც პრეზიდენტმა დაინახა? რა „გარღვევა“ მოხდა ისეთი საქართველოსტან ეკონომიკურ ურთიერთობაში, რაც ბელარუსში ვერ შენიშნეს? სახელმწიფო ტელევიზია სულ იმას გაიძახის, რომ ორ ქვეყანას შორის შთამბეჭდავი ეკონომიკურ ზრდის მომსწრენი ვართო. მაგალითად, «СТВ» („სტოლიჩნოე ტელევიდენიე“) იტყობინება, რომ ბოლო 3 წელიწადში, ანუ 2015 წლიდან, როცა ბელარუსის ლიდერი პირველად ეწვია თბილისს, საქონელთბრუნვა ორჯერ გაიზარდა“.
ოჰო, მაგარი მიღწევაა! უნდა ვიფიქროთ, რომ „პრეზიდენტები პურს ტყუილად ჭამენ“. მაგრამ თუ «Белстат»-ის მონაცემებს ყურადღებით გავეცნობით, სურათი ასეთი ლამაზი აღარ იქნება. 2015 წლიდან საქონელთბრუნვა კი არ იზრდებოდა, არამედ, უბრალოდ, 2012 წელთან შედარებით, პოზიციების აღდგენა ხდებოდა. უფრო მეტიც - აქ წარმატება კი არ ჩანს, არამედ ბელარუსისა და საქართველოს პრეზიდენტების მიერ დასახული გეგმების ჩაშლა.
თვითონ განსაჯეთ: 2015 წლის გაზაფხულზე, თბილისში ვიზიტის დროს, ალექსანდრე ლუკაშენკომ განაცხადა, რომ ჩვენმა ქვეყნებმა ვაჭრობის 200 მილიონ დოლარამდე გაზრდის შესახებ მოილაპარაკესო. თვით ეს ციფრი მაინცდამაინც დიდად შთამბეჭდავი არაა, თუ გავიხსენებთ, რომ ქვეყნის ხელმძღვანელობა სხვა ქვეყნებთან მოლაპარაკების დროს, ჩვეულებრივ, უფრო მეტზე - 500 მილიონ და მილიარდ დოლარზე აცხადებს ხოლმე. მაგრამ სამი წლის განმავლობაში საქართველოსტან მუდმივი კონტაქტების დროს მოკრძალებული ციფრის - 200 მილიონის მიღწევაც კი ვერ მოხერხდა. სახელმწიფო ტელეარხებიდან გვესმის, რომ მხოლოდ 112 მილიონი დოლარის ვაჭრობა გვქონდაო (ალბათ, მხედველობაშია 2017 წლის შედეგები). სხვათა შორის, იგივე მოცულობისაა ჩვენი ვაჭრობა პატარა ესტონეთთან.
ბელარუსისა და საქართველოს ხელმძღვანელები ერთმანეთს სტუმრობენ, კონიაკს აგემოვნებენ, მაგრამ ვერ ვხედავთ ისეთ მართლაც აღმაფრთოვანებელ შედეგებს, რომლებიც მათ ასეთ ძმურ მუსაიფს უნდა მოჰყვეს.
თბილისში ყოფნისას ალექსანდრე ლუკაშენკომ თავის ქართველ კოლეგას - გიორგი მარგველაშვილს ტრაქტორი აჩუქა, მაგრამ საეჭვოა, რომ ამ პატარა ტრაქტორის დახმარებით ორ ქვეყანას შორის საქონელთბრუნვა დაგეგმილ დონემდე გაიზრდება.