აშშ-ის გავლენიან გაზეთ The New York Times-ში გამოქვეყნებულ სტატია-რეცენზიაში საუბარია ამერიკელი რეჟისორის ემილი რელსბეიკის მიერ გადაღებულ დოკუმენტურ ფილმზე ქართული ღვინის შესახებ სახელწოდებით „ჩვენს ძარღვებში ღვინო სჩქეფს“.

საინფორმაციო სააგენტო „ნიუსპრესი“ გთავაზობთ ჟანეტ ქეთსულესის ავტორობით გამოქვეყნებული პუბლიკაციის შინაარსს:

ფილმი ნამდვილად მომხიბლავია, რომელშიც პოსტსაბჭოურ საქართველოში ღვინის დაყენების უძველესი ტრადიციებია გადმოცემული. ქალბატონი ემილი რელსბეიკი, სომელიე ჯერემი ქუინთან ერთად მთელ საქართველოში მოგზაურობს, რათა ქართული მეღვინეობის ტრადიციები შეისწავლოს. საბჭოთა ეპოქაში ღვინის ქარხნულმა წარმოებამ ბევრი ხალხური წესი დავიწყებას მისცა, დღეს კი მათი აღორძინება მიმდინარეობს - ღვინის დამზადება უკვე ქვევრებში, ფერმენტული მეთოდით ხდება, სადაც 9 თვის შემდეგ არომატული სასმელი „იბადება“. ღვინის პირველი დეგუსტაცია საქართველოში წმინდა რიტუალად ითვლება.

ფილმში სხვადასხვა ექსპერტები მონაწილეობენ - არქეოლოგები და ეთნოგრაფები, რომლებიც საქართველოს მღელვარე ისტორიაში ღვინის როლზე საუბრობენ. მართალია, მასში მკაცრად არაა დიფერენცირებული ქვეყნის ცალკეული რეგიონები და ვაზის ჯიშები, მაგრამ სამაგიეროდ ყველაზე მეტი ყურადღება ექცევა ქართველი მეღვინეების საქმიანობას, მათ მიერ დამზადებულ ღვინოებს (გასაყიდად თუ ოჯახური მოხმარებისთვის), რომლებშიც გატაცებულნი არიან სასიამოვნო სასმელის დაყენებით და მასზე პოეტურად საუბრობენ. ერთ-ერთის ნათქვამის თანახმად, ქართული ვაზის მტევანი მიწიდან შეწოვილ ქართველი ხალხის წინაპრების სისხლს შეიცავს, რომელიც ასწლეულების განმავლობაში მტრებთან ბრძოლაშია დაღვრილი.

ფილმში ქართველებიც მონაწილეობენ: რამაზ ნიკოლაძე, გიორგი ნათენაძე, მარიამ იოსებიძე, ლუარსაბ ტოგონიძე.