ბრიტანული სამაუწყებლო კომპანია „ბი-ბი-სი“-ს მიერ გამოქვეყნებულ სტატიაში ნათქვამია, რომ „დიდი ბრიტანეთის პარლამენტის დეპუტატებმა ქვეყნის შინაგანა საქმეთა მინისტრს ამბერ რადს მიმართეს და ბრიტანეთის ტერიტორიაზე ბოლო წლებში მომხდარი საეჭვო (თუ მოულოდნელი) სიკვდილის 14 ფაქტის საფუძველზე აღძრული საქმების საგულდაგულო გამოძიება მოითხოვეს.

საინფორმაციო სააგენტო „ნიუსპრესი“ გთავაზობთ მასალის ქართულენოვან ვერსიას:

ბრიტანელმა დეპუტატებმა ეს განცხადება რუსეთის გენშტაბის მთავარი სადაზვერვო სამმართველოს (ГРУ) ყოფილი პოლკოვნიკის სერგეი სკრიპალის მოწამვლასთან დაკავშირებით გააკეთეს.

ვინ არიან ამ 14 საქმის ფიგურანტები? ბორის ბერეზოვსკი, ბადრი პატარკაციშვილი, ალექსანდრ პერეპელიჩნი, იგორ გოლუბევი, იგორ პომომარევი, სკოტ იანგი, სტივენ კერტისი და სხვები. 14 საქმის შესახებ მასალები ჯერ კიდევ შარშან ამერიკულმა გამოცემამ BuzzFeed-მა გამოქვეყნა. ჟურნალისტური გამოძიების ავტორებმა აღნიშნეს, რომ მათ ხელთ არსებული მონაცემებით, ჩამოთვლილი პირების სიკვდილში რუსეთის სპეცსამსახურებისა და მაფიოზური სტრუქტურების ხელი ურევია, ბრიტანულმა პოლიციამ კი, რუსეთთან კონფლიქტი რომ არ მოსვლოდა, გარდაცვალების ფაქტები თვითმკვლელობად და უბედურ შემთხვევად ჩათვალა“.


„ბი-ბი-სი“-ს სტატიაში მოცემულია ზემოთ აღნიშნული 14 პიროვნების საქმიანობისა და მათ სიკვდილთან დაკავშირებულ გარემოებები.

„ბადრი პატარკაციშვილი

გარდაცვალების თარიღი: 2008 წლის 12 თებერვალი

ქართველი ბიზნესმენი ბადრი პატარკაციშვილი ბორის ბერეზოვსკის საქმიანი პარტნიორი და უახლოესი თანამოაზრე იყო. 2001 წლამდე ბადრი პატარკაციშვილი რუსეთში ბიზნესით იყო დაკავებული. 1995-2001 წლებში მუშაობდა ტელეკომპანია ОРТ-სა და ТВ-6-ში ხელმძღვანელ თანამდებობებზე. 2001 წლის ივლისში რუსეთის გენპროკურატურამ ბადრი პატარკაციშვილს ბრალი წაუყენა, თითქოს მან ხელი შეუწყო საზღვარგარეთ გაქცევაში „აეროფლოტის“ გენდირექტორის ყოფილ მოადგილეს ნიკოლაი გლუშკოვს, რის შემდეგად ბადრი პატარკაციშვილი საქართველოში წავიდა. თავის მხრივ, რუსეთის ხელისუფლებამ ბიზნესმენზე ძებნა გამოაცხადა. მოსკოვმა რამდენჯერმე მოითხოვა საქართველოსაგან ბადრი პატარკაციშვილის გადაცემა, მაგრამ წარუმატებლად.

2008 წლის იანვარში ბადრი პატარკაციშვილმა მონაწილეობა მიიღო საქართველოს პრეზიდენტის არჩევნებში, რომელშიც, მიღებული ხმების რაოდენობით, მესამე ადგილი დაიკავა. იმავე წლის აპრილში იგი ლონდონის გარეუბანში მდებარე თავის სახლში მოულოდნელად გულის შეტევისაგან გარდაიცვალა“-ნათქვამია სტატიაში.