კავკასიის საერთაშორისო უნივერსიტეტში, თბილისში, ავტორიტეტული ქართველი მეცნიერების მონაწილეობით ჩატარდა კონფერენცია თემაზე „საქართველოს ეკლესია გუშინ და დღეს“. კონფერენციის თემა დაკავშირებული იყო ქართულ საზოგადოებაში არსებულ რეზონანსულ საკითხებთან, მათ შორის სომხური მხარის პრეტენზიებს ქართული ეკლესიის მიმართ, რომელიც საქართველოს ტერიტორიაზე მდებარე 400 ეკლესიის კუთვნილებაში გამოიხატება“, - იუწყება ბაქოს გაზეთი «Каспiй».

საინფორმაციო სააგენტო "ნიუსპრესი" გთავაზობთ რაუფ ორუჯევის ავტორობით გამოქვეყნებული მასალის ქართულენოვან რეზიუმეს:


პუბლიკაციაში ვრცლადაა გამოცემული კონფერენციის მონაწილეების - მანგლისის მიტროპოლიტის ანანია ჯაფარიძის, კავკასიის უნივერსიტეტის რექტორის კახაბერ კორძაიას, პროფესოირების - ანზორ თოთაძის, ვაჟა კიკნაძის, ქეთევან შოშიაშვილისა და სხვების გამოსვლები, პოზიციები და თვალსაზრისები.

კონფერენციის მონაწილეთა განცხადებით, სომხები ცდილობენ სპეკულირებას იმ ფაქტებით, რომ ერთ-ერთ ისტორიულ პერიოდში ქართველთა ნაწილი, სომხების მსგავსად, მონოფიზიტები იყვნენ. ფორუმზე აღინიშნა, რომ ქართველი მეცნიერების შრომები აუცილებლად უნდა გამოიცეს.

მართლაც, ბოლო დროს სომხებმა ძალიან ხშირად დაიწყეს პრეტენზიების გამოთქმა, რომ საქართველოში თითქოსდა სომხური კულტურის კვალს შლიან, ქვის ჯვრებს (ხაჩკრებს) იღებენ და სომხური ეკლესიების ქართულად გადაქცევის პროცესი მიმდინარეობსო.

ალბათ, ამ ფონზე აუცილებელია გავიხსენოთ რამდენიმე წლის წინათ სომხეთის პრეზიდენტის სერჟ სარგსიანის ვიზიტი საქართველოში, სომეხთა კათოლიკოს გარეგინთან ერთად. სწორედ მაშინ დაიწყო სკანდალი, რომლის მიხედვით, სომხურმა მხარემ ქართულ ეკლესიას 442 ტაძრის დაბრუნება მოსთხოვა. საქართველოს სომხურმა სასულიერო პირებმა აგიტაცია-პროპაგანდა გააჩაღეს და მთავრობას პრეტენზიები წაუყენეს, რატომ არ ასრულებთ ჩვენს მოთხოვნებსო.

რასაკვირველია, ასეთი ამბები არავის არ მოეწონებოდა, მით უმეტეს, რომ ჯერ უნდა დაამტკიცო, რომ ტაძრები მართლაც სომხების მიერ იყო აშენებული და სომხურ მრევლს ემსახურებოდა. მაგრამ ასეთი რამ არ მომხდარა. უტაქტო მეზობლებისთვის რომ ჭკუა ესწავლებინა, მოგვიანებით ქართულმა მხარემ სომხებს შემხვედრი პრეტენზიები წაუყენა - დაუბრუნდეს ქართულ მართლმადიდებლურ ეკლესიას სომხების მიერ მითვისებული ქართული ტაძრები, რომლებიც ამჟამად სომხეთის ტერიტორიაზე მდებარეობენ. მაგრამ ამ ხერხმა არ გაჭრა: სომხების უკმაყოფილო ხმა კვლავ ისმის. მაგალითად, სულ რაღაც ორიოდე დღის წინათ ერევნის მასმედია წერდა, რომ საქართველოში სომხური ეკლესია „სურბ ნშანი“ საფრთხის ქვეშაა, მას გვერდით სასტუმროს უშენებენო. ამასთან დაკავშირებით სომხეთის სამოციქულო ეკლესიის ქართული ეპარქიის წარმომადგენელმა მიხეილ ავაქიანმა განაცხადა, რომ ისინი ყველა ინსტანციაში შეეცდებიან სასტუმროს მშენებლობაზე ნებართვის გაცემის გაუქმებას. კი ბატონო, დაე შეეცადონ. მხოლოდ საეჭვოა, რომ ამდენი პრეტენზიების ფონზე საქართველოს ხელისუფლება სომხებს თანაგრძნობით მოეკიდება და მშენებლობის გაცემის ნებართვას უკან წაიღებს.