"კიევმა, როგორც ჩანს, მიხეილ სააკააშვილი თავიდან მოიშორა - ნაპრეზიდენტალი ქართველი, რომელიც ჯერ უკრაინის ხელისუფლების საპატიო სტუმარი იყო, შემდეგ კი, მის კრიტიკოსად გადაიქცა. ამ საოცარი ისტორიის ბოლო ეპიზოდი ორშაბათს გათამაშდა, როცა უკრაინის პოლიტიკის მთავარი შფოთისთავი პოლონეთში გააძევეს, ანუ, ოფიციალური კიევის განცხადებით, „ისევ იქ დააბრუნეს, საიდანაც მოვიდა“-ასე იწყება გავლენიანი ფრანგული გამოცემის, «Le Monde»-ს მიერ ბენუა ვიტკინის ავტორობით გამოქვეყნებული სტატია, რომლის ქართულენოვან ვერსიას მცირე შემოკლებით, საინფორმაციო სააგენტო "ნიუსპრესი" გთავაზობთ:

უკრაინის ხელისუფლებამ მიხეილ სააკაშვილის დეპორტაცია ფორმალურად კანონის სრული დაცვით განახორციელა, მაგრამ საბოლოო ჯამში მაინც ნახევარზომებზე გაჩერდა. რა თქმა უნდა, პოლონეთში დეპორტი მიხეილ სააკაშვილისათვის შედარებით უფრო უსაფრთხო იყო, ვიდრე საქართველოში ექსტრადირება, სადაც მას იანვრის დასაწყისში დაუსწრებლად სამი წლით საპყრობილე მიუსაჯეს, თუმცა აქვე ვიტყვით, რომ პროცესი უფრო სასამართლო ვენდეტას ჰგავდა. ასეა თუ ისე, ერთი მხრივ, ყოფილი ქართველი ლიდერის უკრაინელი ადვოკატები ხელისუფლების მიერ ჩადენილ უკანონობაზე ლაპარაკობენ, ხოლო მეორე მხრივ, თვითონ მიხეილ სააკაშვილი საკუთარ თავს მოქალაქეობის არმქონე პირად მიიჩნევს და უკრაინაში რამდენიმე სასამართლო გარჩევის ფიგურანტად ითვლება.

მიხეილ სააკაშვილის უკრაინული კარიერის შუქ-ჩრდილებს თუ გავითვალისწინებთ, მისი პოლონური დეპორტაცია ეჭვებს აღძრავს, რომ ამ ყველაფერს საფუძვლად პოლიტიკური მოტივები აქვს: 2014 წელს - კიევის მაიდანში მონაწილეობა, 2015-ში - პრეზიდენტის მრჩევლობა და ოდესის გუბერნატორობა, 2016-ში - პოსტიდან გადადგომა, ოპოზიციაში გადასვლა და მძაფრი კრიტიკა ყოფილი უნივერსიტეტელი მეგობრის წინააღმდეგ.

რაც არ უნდა იყოს, მიხეილ სააკაშვილის ისტორია ჯერ არ დასრულებულა. იგი არანაირად არ შეურიგდება გაძევებას. უახლოეს ხანში ექს-პრეზიდენტი, ალბათ, ჰოლანდიაში წავა, სადაც მას ცოლ-შვილი ელოდება, ან კიევს ისევ ბრძოლაში გამოიწვევს და საზღვრის დალაშქვრას შეეცდება.