როგორ აფასებენ საქართველოს ყოფილი პრეზიდენტის მიხეილ სააკაშვილის მოქმედებებს უკრაინაში საქართველოს და უკრაინის მეგობრები და რეგიონის ექსპერტები. ამ კითხვებით „ამერიკის ხმამ“ მეთიუ ბრაიზას და მაიკლ კარპენტერს მიმართა.

რეგიონის მკვლევარები ამბობენ, რომ საპროტესტო აქციების მიუხედავად, მიხეილ სააკაშვილს კიევში მესამე მაიდნის გამართვა არ გამოუვიდა.

„მას არ გამოუვიდა მესამე მაიდნის იდეა, პარლამენტის გარშემო კარვების ქალაქის გაშლას კრიტიკული მასა არ აჰყვა, ვფიქრობ ამის მიზეზი ისაა, რომ უკრაინელი ხალხი დაიღალა, მათ ნორმალური ცხოვრება სურთ, სადაც აქვთ სახლი, ტანსაცმელი, საჭმელი და რუტინული ცხოვრება. ვფიქრობ, მათ არ სურთ ქუჩებში გამოსვლა, მაგრამ ასევე არ მგონია უკრაინის ამჟამინდელ ხელისუფლებას დანაპირების შესრულება შეეძლოს. მე არ ვიცი, რა გამოვა ამ ყველაფრიდან. პრობლემები ღრმაა. ამ პოლიტიკურ ელიტას საზოგადოების მოთხოვნების შესრულება არ ძალუძს“, - ამბობს მეთიუ ბრაიზა, „ატლანტიკური საბჭოს“ უფროსი მკვლევარი.

ამასთან, საქართველოს ექს-პრეზიდენტის საქციელს მეთიუ ბრაიზა გაბედულს უწოდებს: „მიხეილ სააკაშვილი ბევრს არ მოწონს, ბევრს მიაჩნია, რომ იგი ზედმეტად აგრესიული და იმპულსურია, მაგრამ ის გამბედავი პოლიტიკოსია. იგი უკრაინიდან გააძევეს, პრეზიდენტმა პეტრო პოროშენკომ მას პასპორტი ჩამოართვა, მაგრამ ამის მიუხედავად, ის პოლონეთში ჩავიდა, იქედან როგორღაც უკრაინაში შესვლა მოახერხა, როგორღაც პოულობს გზას დარჩეს პოლიტიკურად აქტიურად“.

მეთიუ ბრაიზას შეფასებით, უკრაინის მთავრობას მიხეილ სააკაშვილის იქ დარჩენა არ სურს. ექსპერტის აზრით, „არც საქართველოს მთავრობას უნდა მისი ქვეყანაში დაბრუნება. თქვენ რომ პრემიერ-მინისტრი, პრეზიდენტი ან პრემიერის უკან მდგარი ბატონი ბიძინა ივანიშვილი იყოთ - მოგინდებოდათ მიხეილ სააკაშვილის დაბრუნება და პოლიტიკურად გააქტიურება?“

უკრაინაში კორუფციის ზრდაზე და მოსახლეობის იმედგაცრუებაზე საუბრობს ბაიდენის ცენტრის დირექტორი მაიკლ კარპენტერიც. თავდაცვის მდივნის ყოფილი მეორე მოადგილე ამბობს, რომ ბოლო წლის განმავლობაში უკრაინაში კორუფცია გაიზარდა, თუმცა იმის გამო, რომ შეერთებული შტატები და ევროპის კავშირი საშინაო საქმეებზე იყვნენ კონცეტრირებულნი, ნაკლები იყო წნეხი უკრაინის მთავრობაზე.

„არ მგონია ყოფილი პრეზიდენტი მიხეილ სააკაშვილი ამ პრობლემის გასახმოვანებლად სწორი ადამიანი იყოს. ის ზედმეტად პოლარიზებული ფიგურაა. მან საქართველოში სიღრმისეული რეფორმები გაატარა, მაგრამ ასევე მის სახელს უკავშირდება ოპოზიციის წინააღმდეგ სახელმწიფო აპარატის გამოყენება, რაც დემოკრატიულ ნორმებში არ ჯდება. ჩემი აზრით, ის უკრაინის პრობლემებზე სალაპარაკოდ სწორი ფიგურა არ არის“, -ამბობს მაიკლ კარპენტერი. მისი აზრით, ბევრი უკრაინელია, ვისაც შეუძლია გაუძღვეს კორუფციის წინააღმდეგ ბრძოლას და „მიხეილ სააკაშვილი საამისოდ სწორი ფიგურა არ არის“.