„მიხეილ სააკაშვილთან დაკავშირებული სიტუაცია უკრაინის თავის ტკივილია, თანაც ისეთი, რომ მტერს არ ვუსურვებო“, - ეს სიტყვები რუსეთის პრეზიდენტის პრეს-მდივანს დიმიტრი პესკოვს ეკუთვნის. მართლაცდა, ნაპრეზიდენტალ-ნაგუბერნატორალი მიხო არ ისვენებს, მას ხან სახურავზე ვხედავთ, ხან კარავში, იზოლატორში, სასამართლოზე, ქუჩაში... და თავისი მოქმედებით უკრაინის ხელისუფლებას დამშვიდების საშუალებას არ აძლევს.

როგორც რუსული გამოცემა «Наша версия» წერს, უკრაინაში გავრცელებული ხმების მიხედვით თუ ვიმსჯელებთ, მიხეილ სააკაშვილის ორჯერადი დაჭერა-გათავისუფლების ჭეშმარიტი მიზეზი თითქოსდა აშშ-ის სახელმწიფო დეპარტამენტიდან წამოსული ტელეფონის ზარია. ისე, პრესაში ადრეც ხშირად დაუწერიათ და უთქვამთ, რომ საქართველოს ყოფილი პრეზიდენტი უკრაინაში სიტუაციას ამერიკელი გადასახადის გადამხდელის ფულით ურევსო. ბოლო დროს კი უკრაინის ხელისუფლება აქტიურად ავრცელებს იმ ბრალდებას, რომ მიხეილ სააკაშვილს რუსეთში გაქცეული ვიქტორ იანუკოვიჩის გარემოცვა (ჩათვალე: რუსეთის ხელისუფლება) აფინანსებსო.

ბოლო დღეებშიც უკრაინაში მიხეილ სააკაშვილის თავგადასავალი გრძელდება და, როგორც ჩანს, უახლოეს ხანში მოვლენათა ჯაჭვი კიდევ ერთი რგოლით შეივსება. ძნელია არ დაეთანხმო დიმიტრი პესკოვს, რომ პრეზიდენტ პეტრო პოროშენკოსათვის მისი ყოფილი მეგობრის „ოინები“ მართლაც განუწყვეტელ თავის ტკივილს წარმოადგენს.

აშკარაა, რომ დასავლეთში პეტრო პოროშენკოს მიმართ უკვე იმედი გაუცრუვდათ. „როგორც ჩანს, პრეზიდენტი პეტრო პოროშენკო კორუფციას არ ებრძვის და არ ზრუნავს ქვეყნის ეკონომიკურ განვითარებაზეო“, - წერს ეკონომისტი ანდერს ოსლუნდი, რომელსაც თავის დროზე ძალიან სჯეროდა უკრაინის ეკონომიკის განვითარების პერსპექტივა. დასავლეთში პეტრო პოროშენკოს შემცვლელს ეძებენ - მიმდინარეობს კანდიდატების შერჩევა, თვით ერთ-ერთი როკ-ჯგუფის ლიდერის სვიატოსლავ ვიკარჩუკის ჩათვლითაც კი.
რას ფიქრობენ უკრაინელი ექსპერტები? აი, რას ამბობს პოლიტოლოგი მიხეილ პოგრებინსკი: „თუ გავითვალისწინებთ იმას, რომ მიხეილ სააკაშვილს დაბალი პოპულარობა აქვს, იგი პეტრო პოროშენკოს ვერ დაამხობს. კი, საქართველოს ექს-პრეზიდენტს დასავლეთი თითქოს იცავს სერიოზული დასჯისაგან, რამდენჯერმე პატიმრობას გადაარჩინა, მაგრამ იმასაც ყურადღება უნდა მივაქციოთ, რომ მიხოს მაინცდამაინც დიდი დაფინანსება არ აქვს, მას დასავლეთი ღიად და ოფიციალურად მხარს მაინც არ უჭერს. ასევე არ აქვს მას მტკიცე და ერთმნიშვნელოვანი მხარდაჭერა სხვა უკრაინელი ოპოზიციონერებისაგან (ისინი სიტყვით მის მხარეზე არიან, მაგრამ ქუჩაში თავიანთი ხალხი არ გამოჰყავთ. მიხეილ სააკაშვილს კი უკრაინის ხელისუფლების დასამხობად თავისი ძალები არ ეყოფა“.



p.s. იბეჭდება მცირე შემოკლებით

p.p.s. საინფორმაციო სააგენტო „ნიუსპრესის“ მიერ მასალაში გამოყენებული ფოტო ორიგინალის იდენტურია