„დაკავება, ბრალდებები და სენსაციური გათავისუფლება: კონფლიქტი საქართველოს ექს-პრეზიდენტ მიხეილ სააკაშვილსა და უკრაინის პრეზიდენტ პეტრო პოროშენკოს შორის კიდევ უფრო მწვავდება. დრამა ფარსად გადაიქცა, - ნათქვამია გავლენიანი გერმანული რადიოსადგურის, «Deutsche Welle»-ს მიერ რომან გონჩარენკოს ავტორობით გამოქვეყნებულ სტატიაში.

მიხეილ სააკაშვილისათვის მოულოდნელი არ იქნებოდა მის ბინაში საიდუმლო პოლიციის - უშიშროების სამსახურის ნიღბიანი სპეცრაზმელების გამოჩენა, რადგან ამის შესახებ პარტია „ახალი ძალების მოძრაობა“ ჯერ კიდევ რამდენიმე დღის წინ აცხადებდა. პრინციპში, ის ამბები, რაც კოსტელნაიას ქუჩაზე დატრიალდა, მოსალოდნელიც იყო.

არადა, ბოლო დღეებში მიხეილ სააკაშვილის ინიციატივით გამართული ყველა აქცია მაინცდამაინც ბევრ ადამიანს არ იზიდავდა - რამდენიმე დღის წინათ ჩატარებულ მსვლელობაში პეტრო პოროშენკოს იმპიჩმენტის მიზნით მხოლოდ სამი თუ ოთხი ათასამდე კიეველი მონაწილეობდა. კარვების ქალაქმაც თავისი „ხიბლი“ დაკარგა. მოკლედ, მიხოს და მის მოკავშირეებმა მოსახლეობის მობილიზება ვერ შეძლეს.

რა მოხდება საქართველოს ექს-პრეზიდენტის დაკავებისა და მისი სენსაციური გათავისუფლების შემდეგ, ამას უახლოეს დღეებში ვნახავთ. ფაქტია, რომ უკრაინის უშიშროების სამსახური დეკემბერშიც ისევე უსუსურად მოქმედებდა, როგორც სექტემბერში, როცა უპასპორტო და მოქალაქეობის არმქონე მიხეილ სააკაშვილმა პოლონეთ-უკრაინის საზღვარი დაარღვია.

რუსეთი, სადაც მიხეილ სააკაშვილი 2008 წლის ომის შემდეგ მიუღებელ ფიგურას წარმოადგენს, ღვარძლიანად უყურებს კიევში მიმდინარე მოვლენებს. იმის ნაცვლად, რომ ყურადღება გაამახვილოს რუსეთის სპორტსმენთა გუნდის წინააღმდეგ მიღებულ სანქციებზე (სამხრეთ კორეის ზამთრის ოლიმპიურ თამაშებში მონაწილეობის აკრძალვა დოპინგის გამო), რუსული მასმედია მხოლოდ ერთ თემას აშუქებს - აი, შეხედეთ, რა კლოუნივით იქცევა სახურავზე მდგარი ფსევდორევოლუციონერი მიხეილ სააკაშვილიო. ტელეწამყვანები ამ ფაქტის გაშუქებისას პირდაპირ ეთერში სიცილს ვერ იკავებდნენ. გარდა ამისა, კრემლი არადიპლომატიურადაც მოქმედებს: ჩვეულებრივად თავშეკავებული დიმიტრი პესკოვი, პრეზიდენტის პრეს-მდივანიც ამბობს, რომ მიხეილ სააკაშვილმა „ჰალსტუხების ჭამის“ შემდეგ „სახურავზე ძრომიალი“ დაიწყოო.

მიხეილ სააკაშვილს ახლა რამდენიმე სასამართლო პროცესი ელოდება. ჯერ კიდევ გაურკვეველია, გადასცემენ თუ არა მას საქართველოს. უმაღლესმა ადმინისტრაციულმა სასამართლომ პეტრო პოროშენკოს მიერ მიხეილ სააკაშვილისათვის მოქალაქეობის ჩამორთმევის კანონიერების საკითხიც უნდა განიხილოს. სხდომა 21 დეკემბერსაა დანიშნული, რაც მიხეილ სააკაშვილისათვის მნიშვნელოვანი თარიღია - იგი 50 წლისა ხდება.