აშშ-ის ყოველდღიური საერთოეროვნული გაზეთი USA Today-ის კორესპონდენტი სუზან შაინი მკითხველებს ევროპული მოგზაურობის შთაბეჭდილებებს აცნობს. ერთ-ერთი ქვეყანა, რომელშიც იგი იმყოფებოდა, საქართველოა.

საინფორმაციო სააგენტო „ნიუსპრესი“ გთავაზობთ ამონარიდს სტატიიდან:

„ვაღიარებ, როცა პირველად გადავწყვიტე საქართველოში წავსულიყავი, კარგად არც კი ვიცოდი, სად მდებარეობდა ეს ქვეყანა. აღმოჩნდა, რომ ეს პატარა ქვეყანა კასპიისა და შავ ზღვებს შორისაა მოქცეული, ჩრდილოეთით მას რუსეთი ესაზღვრება, სამხრეთიდან კი - თურქეთი.

მენდეთ, რომ ღირს საქართველოს ნახვა.

პირველ რიგში რამდენიმე დღე ამ ქვეყნის დედაქალაქ თბილისში უნდა გაატაროთ. ვიწრო ქუჩა-ბანდებით და ავარიული, დანგრევის პირას მისული შენობები თბილისის ხიბლის მნიშვნელოვანი ნაწილია.

მეორე - როცა ცივი ამინდია, შეგიძლიათ ზოგიერთი ქართულკი კერძი მიირთვათ და გათბებით. ჩემი რეკომენდაციით, ერთ-ერთი ყველაზე გემრიელი საჭმელი ხაჭაპურია - პურის ცომით, ყველით და კვერცხით. ჩემი თბილისური მოგზაურობის დროს საკმაოდ ბევრი ხაჭაპური მივირთვი. როგორც მე ვფიქრობ, ყველაზე კარგ ხაჭაპურს რესტორან „ეზო“-ში ამზადებენ.

არ დაივიწყოთ ღვინო. ამ დღეებში დადგინდა, რომ საქართველო ღვინის სამშობლოა, საქართველოში ამ სასიამოვნო სასმელის წარმოება თურმე 8 ათასი წლის წინ დაუწყიათ. რასაკვირველია, რადგან ახლა საქართველოში ზამთარი ახლოვდება, თქვენ ვერ მიიღებთ მონაწილეობას ვაზის მოსავლის აღებაში, სამაგიეროდ ისიამოვნებთ მისი საბოლოო პროდუქტით, თუ საქართველოს ერთ-ერთ მეღვინეობის კომპანიას ეწვევით.

რობერტ კუპერი, თბილისში არსებული ბარის DiveXFabrika-ს მფლობელი, ღვინის დაგემოვნების მოყვარულებს გირჩევთ ეწვიოთ დედაქალაქიდან 70 კმ-ის მოშორებით მდებარე სიღნაღს, კომპანია „ხოხბის ცრემლებს“’, რომელსაც „მაგიური ძალა განსაკუთრებით ზამთარში აქვს“: თქვენ სიღნაღიდან კახეთის ნაყოფიერ ველს ხედავთ, ჭაღარა კავკასიონის ფონზე და თავს გრძნობთ იქ მომხდარი ისტორიული მოვლენების მონაწილედ“.

და რასაკვირველია, საქართველოში თქვენი ყოფნა სრულყოფილი არ იქნება, თუ თვით კავკასიის ბუმბერაზ მთებს ახლოს არ ნახავთ: „მათი სილამაზე აუწერელია“, - ამბობს რობერ კუპერი, - „იქ ყველაფერი უმაღლეს დონეზეა, სათხილამურო ინსფრასტრუქტურის ჩათვლით, თან საკვირველ დაბალ ფასებში.. გუდაურს 22 სათხილამურო ტრასა აქვს და შეგიძლიათ 20 დოლარად ისარგებლოთ. აღარაფერს ვამბობ ადგილობრივ მოსახლეობაზე - შეგიძლიათ ყოველ სოფელში შეჩერდეთ, ყოველი სახლის კარზე დააკაკუნოთ და იქ თქვენ გულუხვი მასპინძლები გელოდებიან. მსოფლიოში ასეთ კარგ სათხილამურო ადგილს სხვაგან ვერსად ნახავთ“.

აუცილებლად მოინახულეთ ყაზბეგიც. იქ თქვენ ისეთ სასტუმროს ნახავთ, რომელიც პირადად მე მსოფლიოში ყველა სასტუმროს მირჩევნია: ძალიან მაგარი პანორამული ხედებია“, - დასძენს ავტორი.