ევროპარლამენტის სამოქალაქო თავისუფლების, მართლმსაჯულების და საშინაო საქმეთა კომიტეტმა მხარი დაუჭირა ინიციატივას, რომლის მიხედვით, საქართველოს მოქალაქეები, სანამ ევროპაში უვიზოდ გაემგზავრებიან, მანამ მათ „წინასწარი ავტორიზაციის“ პროცედურა უნდა გაიარონ. ყოველი მოქალაქე ვალდებული იქნება შეავსოს ელექტრონული განაცხადი „ევროპული სამოგზაურო ინფორმაციისა და ავტორიზაციის სისტემის“ (ETIAS) ვებ-გვერდზე, მას თან დაურთოს ცნობა სამუშაო ადგილისა და შემოსავლების თაობაზე, გადაიხადოს 10 ევრო და დაელოდოს შენგენის ზონაში შესვლის დადასტურებას. სხვათა შორის, არაა გამორიცხული, რომ პასუხი ნეგატიური იყოს - „ვერ შეგიშვებთ ევროპაშიო“.

საქართველოს საგარეო საქმეთა მინისტრის მოადგილემ ვახტანგ მახარობლიშვილმა მოსახლეობას სთხოვა, რომ „წინასწარ ავტორიზაციას“ ვიზასთან ნუ გააიგივებენ, მით უმეტეს, რომ ახალი ნორმები ჯერ-ჯერობით დამტკიცებული არ არის.

თუმცა, დიპლომატიური აკადემიის ყოფილი რექტორის იოსებ ცინცაძის აზრით, „წინასწარი ავტორიზაცია“ ვიზის ერთ-ერთ ფორმას წარმოადგენს, ოღონდ სხვა სახელით: „ევროპული სამსახურებისათვის ყოველთვის რთულია მოქალაქეს უარი უთხრას უშუალოდ ევროპის აეროპორტებში, ამიტომაც სანამ იქ ჩავალთ, უარს უკვე მანამდე გვეტყვიან“, - ამბობს „კომერსანტთან“ საუბარში პოლიტოლოგი. იოსებ ცინცაძე განმარტავს, რომ „წინასწარი ავტორიზების“ შემოღების ინიციატივა შენგენის ზონაში ქართველთა ნაკადის ზრდითაა განპირობებული: „28 მარტიდან, ანუ იმ დღიდან, როცა უვიზო რეჟიმი ძალაში შევიდა, ევროკავშირის ქვეყნებში ათასობით საქართველოს მოქალაქე დარჩა. შესაბამისად, ბრიუსელს არ შეუძლია ამაზე რეაგირება არ მოახდინოს“, - განაცხადა იოსებ ცინცაძემ და იქვე შენიშნა, რომ ევროკავშირს „არ სურს საქართველოს საჯაროდ შეურაცხყოფა მიაყენოს სავიზო რეჟიმის აღდგენით, ამიტომაც რბილად მოქმედებს“.

ოფიციალური მონაცემების თანახმად, მხოლოდ სამი თვის განმავლობაში უვიზო რეჟიმის შემოღებიდამ ევროკავშირის ქვეყნებში წასული 3 ათასამდე საქართველოს მოქალაქე უკან აღარ დაბრუნებულა. იგულისხმება იმ ვადების დარღვევა, რომელიც შეთანხმებითაა დადგენილი.



წყარო: kommersant.ru