მიხეილ სააკაშვილისა და მისი მხარდამჭერების მიერ უკრაინის სახელმწიფო საზღვრის გადაკვეთის ფაქტს უკრაინული გამოცემა «КП в Украине», ჟურნალისტ ალექსი გაზუბეის სტატიით ეხმაურება.

სააგენტო "ნიუსპრესი" გთავაზობთ მასალის ქართულენოვან ვერსიას:

ისტორიამ, რომელიც 2015 წლის 30 მაისს მიხეილ სააკაშვილისათვის („როგორც სახელმწიფო მნიშვნელობის მქონე პიროვნებისთვის“) უკრაინის მოქალაქის პასპორტის საზეიმო გადაცემით დაიწყო, ახალი ჯადოსნური ბიძგი მიიღო.

შეიძლება ვივარაუდოთ, რომ 10 სექტემბერს საზღვარზე მომხდარი ამბავი კიდევ გაგრძელდება ახალ-ახალი ხისტი დაპირისპირებებით და სპექტაკლებით. „მიხოს გარღვევამ“ კიდევ ერთხელ გვაჩვენა უკრაინის პოლიტიკისა და საზოგადოების პრობლემები:

პირველი - საზღვარს კლიტე თურმე სულაც არ ადევს! ეს რა საზღვარია, პიკნიკივით გამოდის - „ქართველი მოგვყავს! მომაწოდე მარილი, მოგაწვდი პურს“;

მეორე - იულია ტიმოშენკოსა და ანდრეი სადოვოისთვის 10 სექტემბერი „დიდების საღამოდ“ იქცა. სამივემ, მიხეილ სააკაშვილთან ერთად, თავიანთი ძალა აჩვენეს - ჯერ კიდევ არ გამოგვლევია ენერგია, ჯერ კიდევ შეგვიძლია მოსახლეობის აზვირთებაო. მართლაცდა, ლვოვში რომ კარვები დადგმულიყო, ხელისუფლება სრულიად უსუსური აღმოჩნდებოდა. გალიციაში კიევის მითითებებს არ დაემორჩილებოდნენ. ხომ გახსოვთ?

მესამე - საჭიროა ობიექტურად ვთქვათ, რომ მიხეილ სააკაშვილის მიერ საზღვრის გარღვევა 2014 წელს მომხდარ სამინისტროების შენობების დაკავებას ჰგავს. მაშინაც და ახლაც მილიცია//პოლიციის სრული უმოქმედობა და მართვის პარალიჩი. „სახალხო სეირნობა“ გრძელდება;

მეოთხე - რაც არ უნდა იყოს, ფაქტია, რომ ეს ყველაფერი პეტრო პოროშენკოს მიერ გადადგმულმა მოულოდნელმა ნაბიჯმა გამოიწვია, როცა მან მიხეილ სააკაშვილს უკრაინის მოქალაქეობა ჩამოართვა ვითომდა ანკეტაში დაშვებული შეცდომისათვის. ისე გამოდის, რომ თავის დროზე, როცა მან მიხოს მოქალაქეობა მიანიჭა, ბრძანებულებაზე ხელი ისე მოაწერა, რომ არც დაუხედავს - ჩემი ძმა და მეგობარიაო... ჰოდა, პასუხიც მიიღო ძმისა და მეგობრისაგან.

მეხუთე - ძალა ძალის წინააღმდეგ თუ ვინაა „კრემლის აგენტი“ და ვინ „ბარიგა“? საქმე იმაშია, რომ ორივე მხარე ტყუის. მიშისტები საზღვრის უკანონო გადაკვეთას იმით ამართლებენ, რომ „აბა, მაშ რა გვექნა, პეტრომ მიხოს მოქალაქეობა ხომ უკანონოდ ჩამოართვაო“, ანუ მომდევნო დანაშაულს წინა დანაშაულით ამართლებენ! არც პრეზიდენტის მომხრეები არ არიან ანგელოზები - ჩვენ არ ჩავრეულვართ მოვლენების პროცესშიო. აბა, პერემიშლში მატარებელი თავისით ხომ არ გაჩერდებოდა? თითქოს კიევისაგან არანაირი მითითება არ ყოფილა!

მოკლედ, ყველა ცდილობს თავი გაიმართლოს: ჩვენ კი არა, ისინი არიან დამნაშავენიო. იულია ტიმოშენკოს ახლა მოფერებით „ბებიას“ („ბაბუშკას“) ეძახიან.

პოლიტოლოგები ახლა პასუხს ეძებენ კითხვაზე, თუ ვინ მოიგებს თუ წააგებს მომხდარი ამბებით, დაიჭერენ თუ არა მიხეილ სააკაშვილს და რატომ გამოჩნდა ამ მოვლენებში იგორ კოლომოისკი (თუმცა მის გარეშე როგორ იქნებოდა!).

ნათელი მხოლოდ ერთი მომენტია: ჩვენთან სტაბილური სახელმწიფო და პოლიტიკური სიტემა ჯერ-ჯერობით მხოლოდ მიზანია და არა მომხდარი ფაქტი.