გავლენიანი ფრანგული გამოცემა «Le Figaro» მიხეილ სააკაშვილის უკრაინაში ჩასვლას იზაბელ ლასერის სტატიით ეხმაურება, რომლის რეზიუმეს საინფორმაციო სააგენტო "ნიუსპრესი" გთავაზობთ:

ქართული და უკრაინული პოლიტიკუმები მიხეილ სააკაშვილს არ ღებულობენ მისი პოპულარობისა და რადიკალური შეხედულებების გამო. მიუხედავად ამისა, ექს-პრეზიდენტი და ექს-გუბერნატორი აშშ-ს, სადაც მას ბევრი გავლენიანი ნაცნობი ჰყავს, პოლიტიკური თავშესაფარს მაინც არ სთხოვს. რატომ? იმიტომ, რომ ისეთ ადამიანებს, როგორიც მიხეილ სააკაშვილია, სამეცნიერო-კვლევით ორგანიზაციებსა და ფონდებში მუშაობა არ შეუძლიათ. მათთვის აუცილებელია პოლიტიკური სივრცე, საკუთარი ამბიციების განსახორციელებლად. გარდა ამისა, აშშ-სთან მიხეილ სააკაშვილს უსიამოვნო მოგონებებიც აკავშირებს: როცა მისი პარტია საქართველოში საპარლამენტო არჩევნებში დამარცხდა, თვითონ კი პრეზიდენტობის ვადის დასრულების შემდეგ ჯერ ბრიუსელში, შემდეგ კი ნიუ-იორკში წასვლა მოუწია, იგი იძულებული გახდა მხოლოდ ლექტორის ამპლუით, ინტერვიუებით და ბანკეტებით დაკმაყოფილებულიყო, რაც ამბიციური ექს-პრეზიდენტისათვის ნაკლებად პრესტიჟული როლი აღმოჩნდა. მან მოიწყინა და როგორც კი კიევში ამბები დატრიალდა, იგი უკრიანაში ჩავიდა.
"ღირსების რევოლუციამ“ მიხეილ სააკაშვილს პოლიტიკური ახალგაზრდობა დაუბრუნა. როცა თავის უნივერსიტეტელმა მეგობარმა, პრეზიდენტმა პეტრო პოროშენკომ იგი ოდესის საოლქო ადმინისტრაციის ხელმძღვანელად დანიშნა, ექს-პრეზიდენტს სურდა ეჩვენებინა, რომ უკრაინაშიც არის შესაძლებელი გარდაქმნები და რომ საბჭოთა მოდელი არსებობის ბოლო დღეებს ითვლის. უკრაინაში დაბრუნებით მიხეილ სააკაშვილს შორსმიმავალი გეგმები აქვს: მას უნდა პეტრო პოროშენკო პროვოკაციულ ანკესზე წამოაგოს. მისი ამბიციები არ შემოიფარგლება მხოლოდ მოქალაქეობით, ჰორიზონტზე იგი უკრაინის პრეზიდენტის ან პრემიერ-მინისტრის სავარძელს ხედავს.

რამდენად პოპულარულია მიხეილ სააკაშვილი უკრაინაში, რომ ქვეყნის ხელმძღვანელის პოსტზე ჰქონდეს პრეტენზია? ჯერ-ჯერობით ამის ზუსტი განსაზღვრა შეუძლებელია, მაგრამ აშკარაა, რომ დღეს მიხეილ სააკაშვილის შესახებ უკრაინაში ყველა ლაპარაკობს, ზოგიერთი კი დარწმუნებულია, რომ ქვეყნის გადარჩენა მხოლოდ მას შეუძლია.