თბილისის მერმა დავით ნარმანიამ კიდევ ერთი საბავშვო ბაღის მშენებლობას ჩაუყარა საფუძველი. ახალი, შვიდ ჯგუფიანი საბავშვო ბაღი ნუცუბიძის მე-4 მ/რ-ში, ყოფილი 183-ე ბაღის მიმდებარედ შენდება, სადაც ახლა 90-იან წლებში შესახლებული იძულებით გადაადგილებული პირები ცხოვრობენ. პროექტისთვის 2 700-მდე კვადრატული მეტრი ტერიტორიაა გამოყოფილი.

თბილისის მერიის პრესსამსახურის ინფორმაციით, ბაღში 2 ბაგის და 5 სამიდან ექვს წლამდე ასაკობრივი ჯგუფი იქნება. დასაქმდება 50-მდე ადამიანი.

„ჩვენ დავიწყეთ კიდევ ერთი ახალი ბაღის მშენებლობა, რომელიც ნუცუბიძის მე-4 მ/რ-ს მოემსახურება და შესაბამისად, ძალიან ბევრი საცხოვრებელი სახლი, რომელიც გარშემო დგას და იქ მცხოვრები ადამიანები, რომლებსაც ბავშვების შორს ტარება უწევთ, ან საერთოდ ვერ დაყავთ საბავშვო ბაღებში, ამ ახალი ბაღის აშენების შემდეგ იქნებიან დაკმაყოფილებულნი. ეს იქნება აბსოლუტურად თანამედროვე, დაახლოებით, 300 ბავშვზე გათვლილი ბაღი, ენერგოეფექტური და კომფორტული, იმისათვის, რომ ჩვენი პატარები ღირსეულ გარემოში გაიზარდონ,“- განაცხადა თბილისის მერმა დავით ნარმანიამ.

ნუცუბიძის მე-4 მ/რ ერთ-ერთია, სადაც ყველაზე მაღალია მოთხოვნა საბავშვო ბაღებზე, სწორედ, ამ მოთხოვნიდან გამომდინარე შეირჩა ახალი ბაღის ტერიტორიაც.

საბავშვო ბაღი 2018 წლის პირველ ნახევარში დასრულდება და 280-მდე აღსაზრდელს მიიღებს.

თბილისის მერმა მშენებლობის საძირკველში სიმბოლური კაფსულა ბაგა-ბაღების მართვის სააგენტოს ხელმძღვანელ თემურ თორდინავასან ერთად ჩადო.

ღონისძიებაზე თბილისის მერთან ერთად საკრებულოს თავმჯდომარე გიორგი ალიბეგაშვილი, დეპუტატი თამარ ტალიაშვილი და ვაკის რაიონის გამგებლის მოადგილე გიორგი ბირბიჩაძე იმყოფებოდნენ.