გამოცდების ეროვნული ცენტრის ყოფილმა ხელმძღვანელმა მაია მიმინოშვილმა და ცენტრის ყოფილმა თანამშრომლებმა არასამთავრობო ორგანიზაცია   - „საგანმანათლებლო პოლიტიკის და კვლევების ასოციაცია“ დაარსეს.

არასამთავრობო ორგანიზაციის პრეზენტაცია დღეს ფონდ „ღია საზოგადოება - საქართველოს“ ოფისში გაიმართა. ასოციაციის პრეზიდენტი მაია მიმინოშვილი იქნება.

როგორც პრეზენტაციაზე მიმინოშვილმა აღნიშნა, ასოციაციის ძირითადი მიზანი კვლევების საფუძველზე საქართველოს საგანმანათლებლო სივრცეში არსებული ტენდენციების შესწავლა და განათლების ხარისხის გასაუმჯობესებლად, რეკომენდაციების შემუშავებაა.

მისი თქმით, ასოციაცია წარმატებული საგანმანათლებლო სისტემების შესწავლასა და ამ გამოცდილების გაზიარებას შეუწყობს ხელს.

“ორგანიზაცია შექმნა გუნდმა, რომელიც საგამოცდო სფეროში ათი წლის განმავლობაში მუშაობდა. ეს ის გუნდია, რომელმაც ამ დროის განმავლობაში დიდი გამოცდილება დააგროვა. უნიკალური შემთხვევაა, რომ ისევ ერთად ვართ. ერთად მუშაობის გამოცდილება იმის საშუალებას გვაძლევს, რომ ამ ორგანიზაციით კარგი საქმეები გავაკეთოთ“ - განაცხადა მაია მიმინოშვილმა.

მისივე თქმით, ასოციაციის ძირითადი მიმართულება საგანმანათლებლო კვლევების, მათზე დაფუძნებელი რეკომენდაციების მომზადება და განათლების სამინისტროსთვის მიწოდება იქნება.

როგორც მიმინოშვილმა განმარტა, უახლოეს მომავალში, ასოციაცია რამდენიმე საპროექტო მიმართულებას წარადგენს.

„საგანმანათლებლო პოლიტიკისა და კვლევების ასოციაცია“, რომელშიც 60 თანამშრომელია გაწევრიანებული, საკუთარ საქმიანობას საერთაშორისო დონორი ორგანიზაციების მხარდაჭერით განახორციელებს, რომელთა რიგებშიც ჰოლანდიური ორგანიზაცია “DUTCH TEST“ იქნება.