მეზღვაურთა საერთაშორისო დღისადმი მიძღვნილი ღონისძიებების ფარგლებში ბათუმის სახელმწიფო საზღვაო აკადემიის წარჩინებული სტუდენტები
დააჯილდოვეს. ღონისძიება საზეიმოდ გახსნა ბათუმის სახელმწიფო საზღვაო აკადემიის რექტორმა ირაკლი შარაბიძემ. მეზღვაურებს პროფესიული დღე მიულოცეს საქართველოს ეკონომიკისა და მდგრადი განვითარების მინისტრმა გიორგი გახარიამ, აჭარის ა/რ რესპუბლიკის მთავრობის თავჯდომარემ ზურაბ პატარაძემ, საზღვაო ტრანსპორტის სააგენტოს დირექტორმა მამუკა ახალაძემ და სხვა მოწვეულმა სტუმრებმა.
,,დღეს ჩვენ ყველანი შევიკრიბეთ მეზღვაურთა დღისადმი მიძღვნილ ღონისძიებაზე, რომელსაც 2011 წლიდან მთელ მსოფლიოსთან ერთად საქართველოც აღნიშნავს. სიმბოლურია, რომ სწორედ ამ დღეს, ჩვენთან ერთად, ბათუმის საზღვაო აკადემიის 350-მდე კურსდამთავრებული ზეიმობს. გილოცავთ თითოეულ კურსდამთავრებულს, მოქმედ თუ მომავალ მეზღვაურს და ამ სფეროში დასაქმებულ თითოეულ ადამიანს. გისურვებთ პროფესიულ წარმატებას ამ რთულ და საპასუხისმგებლო საქმეში”-აღნიშნა მილოცვისას ზურაბ პატარაძემ.
საზღვაო აკადემიის მეოთხეკურსელთა საზეიმო დაჯილდოების შემდეგ ეკონომიკისა და მდგრადი განვითარების მინისტრმა გიორგი გახარიამ და აჭარის რესპუბლიკის მთავრობის თავჯდომარემ ზურაბ პატარაძემ საზეინკლო, სახარატო, ელექტროშედუღების და ელექტროსამონტაჟო ლაბორატორიები ოფიციალურად გახსნეს.
თანამედროვე აღჭურვილობა მთლიანად მოიცავს ყველა იმ მოწყობილობას, რომელიც საჭიროა გემის ინჟინერ-მექანიკოსის კვალიფიკაციის მისაღებად. აღნიშნული ლაბორატორიები საზღვაო აკადემიას დაეხმარება პრაქტიკული უნარ-ჩვევების გამყარებასა და თანამედროვე სტანდარტების შესაბამისი ცოდნის მიღებაში. ლაბორატორიების შესაძენად ბათუმის სახელმწიფო საზღვაო აკადემიას აჭარის მთავრობის ბიუჯეტიდან 870 000 ლარი გამოეყო.
წელს საზღვაო აკადემია 360-მა სტუდენტმა დაამთავრა.

















