მეზღვაურის პროფესიული დღისადმი მიძღვნილ ღონისძიებებს ბათუმში აჭარის ა/რ მთავრობის თავმჯდომარე ზურაბ პატარაძე, საქართველოს ეკონომიკისა და მდგრადი განვითარების მინისტრი გიორგი გახარია და სხვა ოფიციალური პირები შეუერთდნენ. მთავრობის წარმოამდგენლებმა მე-10 ნავმისადგომზე შეკრებილ მოქმედ თუ ვეტერან მეზღვაურებს პროფესიული დღესასწაული მიულოცეს.

,,მინდა მივულოცო დღევანდელი დღე ყველა მეზღვაურს. მეზღვაურებთან ერთად ვულოცავ ყველა იმ ადამიანს, რომლებიც საზღვაო სფეროს განვითარებას ემსახურება. მეზღვაურობა მთელს მსოფლიოში საპატიო და საამაყო პროფესიაა. იგი ერთ-ერთი ყველაზე საინტერესო, ამავდროულად რთული საქმიანობაა. მეზღვაურის პროფესია მოითხოვს გამძლეობას, სიმამაცეს, სიმტკიცეს და დიდ ნებისყოფას. მიხარია, რომ ქართველ მეზღვაურთა უმრავლესობა სწორედ აჭარის მკვიდრია. მეზღვაურის ფორმაში გამოწყობილი ახალგაზრდები კი ბათუმისთვის დამახასიათებელი კოლორიტია“-აღნიშნა მილოცვისას ზურაბ პატარაძემ.

მეზღვაურთა ღვაწლის დასაფასებლად გაიმართა დაჯილდოების ცერემონიალი. საზღვაო სფეროში შეტანილი განსაკუთრებული წვლილისათვის და ზღვაზე ჩადენილი სიმამაცისთვის 9 ქართველ მეზღვაურს მამა ილია კარტოზიას ჯილდო ხელისუფლების წარმომადგენლებმა გადასცეს. გარდაცვლილი მეზღვაურების საპატივსაცემად კი ზღვაში გვირგვინები ჩაუშვეს.

დღეს განსაკუთრებულ პატივს მიაგებენ მეზღვაურებს, რომელთაც მსოფლიოში წარმოებული ტვირთის 90% ზღვით გადააქვთ. მეზღვაურები პირდაპირ არიან ჩართულნი პროცესში, რომელიც არა მხოლოდ სანაოსნო ბიზნესს ამოძრავებს, არამედ გარანტიაა, რომ მსოფლიო ეკონომიკა განაგრძობს ზრდას და განვითარებას. საქართველო, როგორც მსოფლიო ეკონომიკისათვის მეზღვაურთა სამუშაო ძალის მიმწოდებელი ქვეყანა, 10,000-მდე მეზღვაურის სამშობლოა, რომლებიც მსოფლიოს გარშემო სხვადასხვა სახელმწიფოების დროშით მცურავ ასობით გემზეა არიან დასაქმებულნი. მათ უდიდესი როლი შეაქვთ როგორც რეგიონის, ისე ქვეყნის ეკონომიკის განვითარებასა და წინსვლაში.