მიმდინარე წლის 10-11 ივნისის ღამის საათებში სეტყვის საწინააღმდეგო სისტემამ კახეთის რეგიონში უპრეცენდენტოდ დიდი მასშტაბის სეტყვასაშიში ღრუბლის მასებზე მოახდინა აქტიური ზემოქმედება.

"დელტას" ინფორმაციით, სეტყვის მარცვლის მოსალოდნელი ზომა 48 მმ-მდე მერყეობდა. კახეთის 8 რაიონში რაკეტებით დამუშავდა 4128 კმ2 საერთო ფართობის მქონე სეტყვასაშიში ღრუბლის მასები. გასროლილი იქნა 500-მდე რაკეტა.

ჰაერში საფრენი აპარატების არსებობის გამო, დამუშავება მუდმივი შეზღუდვების პირობებში ხორციელდებოდა. მიუხედავად ამისა, აქტიური ზემოქმედების შედეგად, კახეთის რეგიონის თავზე განვითარებული უმძლავრესი ატმოსფერული პროცესების მაქსიმალურად განეიტრალება მოხერხდა, ხოლო ნალექის დიდი ნაწილი რვავე რაიონში ძირითადად წვიმის სახით ჩამოიცალა.

"კახეთის რეგიონში სეტყვასაწინააღმდეგო სისტემით დაცული 600 ათასი ჰექტრიდან სეტყვის მოსვლა დიდ ფართობებზე გაშლილ სასოფლო-სამეურნეო სავარგულებში მაქსიმალურად იქნა თავიდან არიდებული.

სეტყვასაწინააღმდეგო სისტემის ეფექტიანი მუშაობის შედეგად მსხვილი სეტყვის განეიტრალება მოხერხდა თელავის, ყვარელის, ლაგოდეხის და დედოფლისწყაროს რაიონებში, სადაც დამუშავებული ნალექი ძირითადად ბრტყელი წვიმისა და წვრილი სეტყვის მარცვლების სახით ჩამოიცალა"-აცხადებენ "დელტა"-ში.