საქართველოს დამოუკიდებლობის დღისადმი მიძღვნილი ღონისძიებების ფარგლებში, სოფლის მეურნეობის სამინისტრო ხვალ სტენდებს თბილისსა და მცხეთაში წარმოადგენს.

სამინისტროს ინფორმაციით, მათ სტენდზე წარმოდგენილი იქნება სახელმწიფო პროექტების ფარგლებში დაფინანსებული აგრარული მიმართულების საწარმოებისა და სასოფლო-სამეურნეო კოოპერატივების მიერ წარმოებული პროდუქცია - სხვადასხვა სახის თაფლი და თაფლის პროდუქტები, ღვინისა და ყველის ნაირსახეობა, ჩაი, ჩურჩხელა, ბადაგი, თხილი, დეკას ჩაი, სუბლიმირებული ხილი, ხილის ჩირი, მოცვი, სხვადასხვა სახის კომპოტი და წვენი, ჯემებისა და მურაბების ნაირსახეობა, ზეთისხილი და სოკო.
სამინისტროს სტენდის სტუმრებს საშუალება ექნებათ დააგემოვნონ და შეიძინონ წარმოდგენილი პროდუქცია, ასევე გადაიღონ სამახსოვრო ფოტოები ორიგინალურ დეკორაციებთან, რომლებიც ქართული ხილითა და ბოსტნეულით იქნება გაფორმებული.

თბილისში და მცხეთაში წარმოდგენილ სტენდებს სოფლის მეურნეობის მინისტრი ლევან დავითაშვილი დაათვალიერებს.