გარემოსდაცვითი ზედამხედველობის დეპარტამენტი, სოციალური ქსელის ერთ-ერთ ჯგუფში, მელიის ლეკვებისადმი სასტიკი მოპყრობის ამსახველ ვიდეომასალას ეხმაურება და განმარტავს, რომ ქვემო ქართლის რეგიონული სამმართველოს თანამშრომლებმა ოპერატიული ღონისძიებები გაატარეს.
დეპარტამენტის თანამშრომლებმა ვიდეოზე ასახული პირის იდენტიფიცირება მოახდინეს. წალკის მუნიციპალიტეტის, სოფელ კუშში მცხოვრებ მოქალაქე დ.ნ.-ს ახსნა-განმარტება ჩამოერთვა.
მისი განმარტებით, მელია უნადგურებდა შინაურ ფრინველს, რის საფუძველზეც მოქალაქე დაურეგისტრირებელი სანადირო თოფით დაედევნა ცხოველს. მელიის ლეკვები კი მისმა მონადირე ძაღლმა ამოიყვანა სოროდან, ამიტომაც აღენიშნებათ ლეკვებს დაზიანებები სოციალურ ქსელში გავრცელებულ ვიდეომასალაში.
მომხდართან დაკავშირებით შედგა ადმინისტრაციული სამართალდარღვევის ოქმი. მოქალაქეს ჩამოერთვა და დაილუქა სანადირო იარაღი. მასალები შემდგომი რეაგირებისათვის შესაბამის ორგანოს გადაეგზავნება.