არასამთავრობო ორგანიზაცია „ახალი თაობა – ახალი ინიციატივა“ დღეს საქართველოს ყველა რეგიონში პროექტის - „საქართველო ევროპაში“ ფარგლებში  ავტოტურს იწყებს. ამის შესახებ „ნიუსპრესს“ორგანიზაციიდან აცნობეს.

ავტოტურის დროს ორგანიზატორებთან ერთად, საინფორმაციო კამპანიაში ევროკავშირის, ევროპის სამეზობლო პოლიტიკისა და საქართველოს ევროინტეგრაციის საკითხებზე მომუშავე ექსპერტები და მაღალი რანგის ოფიციალური პირები ჩაერთვებიან.

შეხვედრების ფორმატში სამოქალაქო ცნობიერების ამაღლების მიზნით სემინარები გაიმართება. მოსახლეობას საქართველოს ევროინტეგრაციის პროცესისა და ზოგადად ევროკავშირის შესახებ საინფორმაციო მასალა დაურიგდება და საინტერესო კითხვებზე კომპეტენტური პასუხების მიღების საშუალება ექნება.

შეხვედრები გაიმართება როგორც სოფლების ისე ქალაქების მოსახლეობასთან. შეხვედრებზე მოწვეული იქნებიან საზოგადოების ყველა ფენისა და ასაკის წარმომადგენლები.

პროექტი დღეს კახეთში დაიწყება და 10 ივლისს სამცხე-ჯავახეთში დასრულდება.