ხულოს მუნიციპალიტეტის გამგეობის მცირე დარბაზში დღეს ორგანიზაცია CENN-ის აჭარის კოორდინატორმა კახაბერ გუჩმანიძემ, გამგებლის პირველ მოადგილე ლაშა ბოლქვაძესთან ერთად საჯარო და სამოქალაქო სექტორის წარმომადგენლებთან შეხვედრა გამართა. შეხვედრის მიზანს ნარჩენების მართვის 2016–2030 წლების ეროვნული სტრატეგიისა და 2016–2020 წლების ნარჩენების მართვის ეროვნული სამოქმედო გეგმის ადგილობრივ დონეზე განხილვა წარმოადგენდა.

საქართველოს კანონის “ნარჩენების მართვის კოდექსი” მე-13 მუხლის თანახმად ადგილობრივი თვითმმართველობები ვალდებულნი არიან შეიმუშაონ მუნიციპალური ნარჩენების მართვის გეგმები. მუნიციპალური ნარჩენების მართვის გეგმა წარმოადგენს ჩარჩო-დოკუმენტს, რომლის მიხედვითაც მუნიციპალიტეტი განახორციელებს მის იურისდიქციაში, ნარჩენების მართვას და შეასრულებს იმ ვალდებულებებს, რაც მას აკისრია ნარჩენების მართვის კუთხით ეროვნული კანონმდებლობის მიხედვით.
აღნიშნული გეგმის მიზანს წარმოადგენს მუნიციპალიტეტის ტერიტორიაზე ნარჩენების მართვის სისტემების გაუმჯობესება.

ხულოს მუნიციპალიტეტის გამგეობაში დაწყებულია მუშაობა ნარჩების მართვის გეგმის შემუშავებაზე. მუნიციპალური ნარჩენების მართვის გეგმა მზადდება “ნარჩენების მართვის კოდექსის” მოთხოვნების შესაბამისად. გეგმის მიზანია მუნიციპალიტეტის ტერიტორიაზე ნარჩენების მართვის პროცესის დაგეგმვა ნარჩენების ინტეგრირებული მართვის თანამედროვე პრაქტიკის მოთხოვნების შესაბამისად. კერძოდ, გეგმა მიზნად ისახავს მუნიციპალიტეტის ტერიტორიაზე ნარჩენების მართვის ისეთი სისტემის შემუშავებასა და განხორციელებას, რომელიც უზრუნველყოფს ხულოს მუნიციპალიტეტის ტერიტორიაზე როგორც მოსახლეობისათვის, ისე ადგილობრივი ორგანიზაცია-დაწესებულებების და საწარმოებისათვის ნარჩენების შეგროვებისა და გატანის ეფექტიანი სერვისის მიწოდებას.

როგორც ყველა პროექტი, აღნიშნული გეგმაც ითვალისწინებს ნარჩენების მართვის გეგმის საჯარო განხილვებს, გამოკითხვებს, და მოსახლეობის ინტერესების გათვალისწინებას, აგრეთვე მოსახლეობის დამოკიდებულებისა და ინფორმირებულობის დონის შესწავლას ისეთი საკითხებისადმი როგორებიცაა ნარჩენების შეგროვების სისტემა, ნარჩენების შეგროვებისა და ტრანსპორტირების მომსახურების გადასახადი და მისი ამოღება, ამ მომსახურების ეფექტიანობა, გარემოს დაბინძურება და სხვა.