გოეთეს ინსტიტუტში ხვალ ყოველწლიური პროექტი „გერმანული ენის თვე“ ოფიციალურად გაიხსნება, რომელსაც საზეიმოდ გახსნიან ავსტრიის რესპუბლიკის ელჩი არად ბენკო, გერმანიის ელჩის მუდმივი წარმომადგენელი მონიკა ლენჰარდი, შვეიცარიის კონფედერაციის ელჩი ლუკასბეგლინგერი და ასევე საქართველოს მთავრობის წარმომადგენელი.
გერმანული ენის თვე სლოგანით „სამი ქვეყანა - ერთი ენა“ წელს უკვე მეხუთედ იმართება, 27 აპრილიდან 25 ივნისამდე გრძელდება და თავისი შინაარსით ყველა იმ კულტურულ თუ საგანმანათლებლო ღონისძიებას მოიცავს, რაც გერმანულ ენასა და გერმანულენოვან ქვეყნებს შეეხება.

"გერმანული ენის თვის" ორგანიზატორები არიან გერმანიის, ავსტრიისა და შვეიცარიის საელჩოები, გერმანიის აკადემიური გაცვლის სამსახური (DAAD), გოეთეს ინსტიტუტი, ავსტრიის ბიბლიოთეკა თბილისში და საზღვარგარეთ სასკოლო სწავლების გერმანიის ცენტრალური უწყება (ZfA). „გერმანული ენის თვით“ ეს ორგანიზაციები 2013 წლიდან რამდენიმე უცხო ენისა და მათ შორის გერმანული ენის შესწავლის აუცილებლობაზე აკეთებენ მნიშვნელოვან აქცენტებს.
წლევანელი პროგრამის ლაიტმოტივია „ქალები გერმანულენოვან ქვეყნებში, რომლის ფარგლებშიც წარმოდგენილი იქნება ღონისძიებათა მრავალფეროვანი სპექტრი საქართველოს სხვადასხვა ქალაქებში, -ლექციები, ფილმების ჩვენებები, ლიტერატურული საღამოები, საინფორმაციო ღონისძიებები და სპორტული აქტივობები, როგორიცაა გოგონათა საფეხბურთო ტურნირი. ერთ-ერთი განსაკუთრებული ღონისძიებაა „გერმანულენოვანი Poetry-Slam საქართველოში“, რომლის დროსაც ქართველი მოსწავლეები Poetry-Slam-ის ცნობილი გერმანელი და შევიცარიელი ხელოვანების თანხლებით უცხო ენის ცონდას შემოქმედებითი ფორმით წარმოაჩენენ. დაგეგმილმა მრავალმა ღონისძიებამ საზოგადოებას გერმანული ენის სწავლისა და გერმანულენოვანი ქვეყნების გაცნობის სურვილი უნდა გაუღვივოს, აღნიშნული ქვეყნების კულტრის მრავალფეროვნება წარმოაჩინოს და ამავდროულად ქართული საზოგადოების ცნობიერებაში გერმანული ენის უფრო მეტად დამკვიდრებას შეუწყოს ხელი.