„ბოლო პერიოდში, მედიაში და საზოგადოებაში ახალი სახელმძღვანელოების მომზადების საკითხები აქტიურად განიხილება. მიუხედავად იმისა, რომ სამინისტრო ყველა დაინტერესებულ მხარესთან მუშაობს, სამუშაო პროცესის მიღმა გარკვეული ძალები ცდილობენ თემის პოლიტიზებას. შესაბამისად, სამინისტრო მიიჩნევს, რომ აუცილებელია საზოგადოებამ ზუსტად იცოდეს პროცესის ყველა მნიშვნელოვანიო ასპექტი“-აღნიშნულის შესახებ განათლებისა და მეცნიერების სამინისტროს განცხადებაშია ნათქვამი, რომელსაც საინფორმაციო სააგენტო „ნიუსპრესი“ უცვლელად გთავაზობთ:
„პირველ რიგში, გრიფირების წესი ეხება იმ სახელმძღანელოების მომზადების პროცესს, რომლებიც სკოლაში 2018/19 სასწავლო წელისთვის შევა. გრიფირება, ეს პირველი ეტაპია, როდესაც ყველა დაინტერესებული პირი ამზადებს სახელმძღვანელოს მაკეტს, რომელიც შეფასებას გადის დარგის საუკეთესო ექსპერტებისაგან შემდგარ სახელმწიფო კომისიაში და არჩევს რომელი წიგნის ხარისხი შეესაბამება ეროვნული სასწავლო გეგმისა და სხვა მოთხოვნებს. მნიშვნელოვანია, რომ პირველად გრიფირების ისტორიაში, წიგნების დაბეჭდვამდე, მინიმუმ 3 თვის მანძილზე ის ხელმისაწვდომი იქნება სპეციალისტებისა და მასწავლებლებისათვის. ავტორები ვალდებულნი იქნებიან აღმოფხვრან ამ პერიოდში გამოვლენილი ყველა ხარვეზი.
ამასთან, მიუხედავად გავრცელებული ინფორმაციისა, უფასო სახელმძღვანელოების პროგრამა არ გაუქმებულა არ გაუქმდება, ის მთავრობის გასულ წელს დამტკიცებულ ოთხწლიანი გეგმის ნაწილია.
ხაზგასმით აღვნიშნავთ, რომ სამინისტრო აქტიურად თანამშრომლობდა გამომცემლებთან, რის შედეგადაც გათვალისწინებული იქნა გამომცემლების იმ ნაწილთან განხილული საკითხები, რომლებიც არ გაემიჯნენ პროცესს და არ შეუშინდნენ კოლეგების ზეწოლას.
ა. შემუშავდა გრიფირების ახალი ფორმატი, რომელიც აპელაციის ახალ ინსტრუმენტებს, თანასწორობასა და მეტ გამჭვირვალობას გულისხმობს;
ბ. შემუშავდა საავტორო უფლებების დაცვის უპრეცედენტო მოდელი ჰოლოგრამის გამოყენებით;
გ. გაუქმდა შინაარსობრივი გრიფირების საფასური;
დ. შემუშავდა ტენდერის გამარტივებული მოდელი;
ე. გაუქმდა წინა გრიფირების ფარგლებში არსებული ჯარიმები;
ვ. აღმოფხვრილია რიგი საზღვარგარეთული გამომცემლობების პრიორიტეტი უცხოენოვან სახელმძღვანელოებზე;
ასეთი შეთანხმებების ფონზე, გამომცემელთა ნაწილი უკმაყოფილებას გამოხატავს შემდეგზე:
1. საქართველოს კანონმდებლობით, საბიუჯეტო სახსრებით რაიმეს შეძენა, მით უმეტეს, თუ საქმე რამდენიმე მილიონს ეხება, უნდა განხორციელდეს ტენდერით. ულტიმატუმი, სწორედ ტენდერის არჩატარებაზეა აქცენტირებული.
ნებისმიერი პრეტენზია, თითქოს ინტელექტუალურ საკუთრებაზე ტენდერის ჩატარება დაუშვებელია მიუღებელია. რეალობა არის ის, რომ სწორედ ინტელექტუალური საკუთრების სფეროში, შეჯიბრებითობის მოდელი არსებობს და ფართოდ გამოიყენება. შესაბამისად, ტენდერის პრინციპი, როგორც კანონისა და საზოგადოებრივი ინტერესების მოთხოვნა, რჩება უცვლელი.
2. მეორე კატეგორიული მოთხოვნა, რაზეც სამინისტრო გამომცემლობას არ ეთანხმება, გამომცემლების მიერ საჯარო სკოლებისთვის წიგნების სავალდებულო დაბეჭდვის მოთხოვნაა. ინტელექტუალური საკუთრების დაცვის ფაქტორი, როგორც არგუმენტი, უკვე გამოირიცხა, რადგან ჰოლოგრამის გამოყენება ამ პრობლემას არსებითად ხსნის. შესაბამისად, რჩება მხოლოდ რიგი სუბიექტები სურვილი, აკონტროლონ პროცესი და არ დაუშვან კონკურენცია.
დღეს წიგნების წარმოება და მათი ბეჭდვა ორი განსხვავებული სეგმენტია. ამის დასტურია გამომცემლები, რომლებსაც არა აქვთ საკუთარი სტამბა და პირიქით, სტამბები, რომლებიც არ არიან გამომცემლობის ნაწილი. ამის დასტურია ელექტრონული წიგნებიც, რომლებიც საერთოდ არ იბეჭდება. ამ ფონზე, აუცილებელი არ არის, რომ საუკეთესო წიგნის შემქმნელმა, მისი ყველაზე კარგად დაბეჭდვაც შეძლოს. ამ შემთხვევაშიც, ჩვენ ვხედავთ გამომცემელთა ნაწილის სურვილს, არ დაუშვას ბაზარზე კონკურენცია და ახალი მოთამაშეების გაჩენა, რომელთა გამოჩენის პროცესს სამინისტრო ინტენსიურად შეუწყობს ხელს, რადგან წიგნებს ავტორები ქმნიან და არა გამომცებლები. უკვე დაწყებულია ავტორთა ინტენსიური ტრენინგი, რომელიც წარმატებით ვითარდება. ასევე, პირველად შემოდის წიგნების პერიოდული გაუმჯობესების ვალდებულება.
რაც შეეხება თანხებს, სწორედ გამომცემლებთან კომუნიკაციის საფუძველზე, წინა გრიფირებასთან მიმართებაში დაახლოებით ორჯერ არის გაზრდილი გამომცემლობის (ბეჭდვის გარეშე) საპროგნოზო ღირებულება და დაახლოებით 7.5 მილიონ ლარს შეადგენს ვვარაუდობთ, რომ კონკურენცია ამ თანხას შეამცირებს. ამასთან, ყველა თეთრი, რომელიც ზედმეტად არ იქნება გადახდილი, მიმართული იქნება სწავლის პროცესის გაუმჯობესების სხვა მიმართულებებზე - თვალსაჩინოებებზე, ლაბორატორიებზე, ყველაფერზე, რაც წიგნთან ერთად თანამედროვე განათლების აუცილებელი ნაწილია.
შესაბამისად, სრულიად ნათელია, რომ სამინისტრო, მიმდინარე რეფორმის ფარგლებში, ყველა აუცილებელ ნაბიჯს დგამს, რათა მოსწავლეებმა 21 საუკუნის მოთხოვნათა შესაბამისი განათლება მიიღონ“-ნათქვამია განცხადებაში.