პორტუგალიაში საქართველოს საელჩოს ხელშეწყობითა და ინიციატივით, საქართველოს, კერძოდ კი ყვარლის რაიონს ეწვია პორტუგალიის დელეგაცია ალენტეჟუს რეგიონის სოფელ კუბას მერის ხელმძღვანელობით. ვიზიტი მიზნად ისახავდა ორი სოფლის დამეგობრებას და ამ ფორმით სამომავლო თანამშრომლობის საკითხების განხილვას.

ვიზიტის ფარგლებში ხელი მოწერა "ურთიერთგაგების მემორანდუმს საქართველოს ყვარლის რაიონის სოფელ შილდასა და პორტუგალიის რესპუბლიკის ალენტეჟუს რეგიონის სოფელ კუბას შორის". დოკუმენტს საზეიმო ვითარებაში ხელი მოაწერეს ყვარლის მუნიციპალიტეტის საკრებულოს თავმჯდომარემ ჯემალ შავერდაშვილმა და მერმა ჟოაუ მანუელ პორტუგეშმა.

პორტუგალიის დელეგაციის წევრებმა შეხვედრები გამართეს კახეთის გუბერნატორთან ირაკლი ქადაგიშვილთან და ყვარლის მუნიციპალიტეტის თანამშრომლებთან. მხარეებმა გამოხატეს სურვილი და მზადყოფნა სამომავლოდ კულტურული და ეკონომიკური ურთიერთობების გაღრმავების თაობაზე.

საქართველოში ვიზიტის ფარგლებში პორტუგალიელი სტუმრები სოფელ შილდის მოსახლეობას შეხვდნენ, დაათვალიერეს მუნიციპალიტეტის მიერ ბოლო პერიოდში განხორციელებული პროექტები, ეწვივნენ ილიას მუზეუმს, ილიას გორას, ნეკრესისა და გრემის მონასტრებს და მოინახულეს რამდენიმე ღვინის ქარხანა. აღსანიშნავია, რომ ალენტეჟუს რეგიონი და სოფელი კუბა განთქმულია მეღვინეობით, მათ შორის აქ იწარმოება ქვევრის ღვინო. ასევე ალენტეჟური ხალხური სიმღერა (Cante Alentejano) იუნესკოს მიერ აღიარებულია მსოფლიოს არამატერიალურ კულტურის ძეგლად. ეს ორი ძირითადი კომპონენტი საქართველოსა და პორტუგალიის ამ სოფლებს ერთმანეთთან მჭიდროდ აკავშირებს.

ვიზიტის ფარგლებში სტუმრებმა მონაწილეობა მიიღეს სპეციალურად მათთვის დაგეგმილ კულტურულ ღონისძიებაში, გაეცნენ პურის ცხობისა და ჩურჩხელის ამოვლების ტექნოლოგიებს, სპეციალურად მათთვის ბავშვთა ფოლკლორული ანსამბლის მიერ შესრულდა ხალხური სიმღერები.

პორტუგალიის დელეგაციის შემადგენლობაში იყვნენ სოფელ კუბას მერი ჟოაუ მანუელ პორტუგეში, გამგებელი სანდრა ბრაზი და უფროსი თანაშემწე დულსე ლოპეში.