უწყებათაშორისმა კომისიამ „თავისუფალი და სამართლიანი არჩევნებისთვის“ რუსთავის მერიის მიერ ქალაქის გარეუბნებსა და სოფელ სამგორში  სოციალურად დაუცველი 420 ოჯახისთვის კარტოფილის უსასყიდლოდ გადაცემის ფაქტი შეისწავლა და ფინანსთა სამინისტროს რეკომენდაციით მიმართა.
კომისია რეკომენდაციას აძლევს ფინანსთა სამინისტროს, რომ წინასაარჩევნო პერიოდში შეაჩეროს სამინისტროს მიერ ჩამორთმეული უკანონო ქონების სოციალური მიზნებისთვის განკარგვა ადგილობრივი თვითმმართველობის ორგანოების მეშვეობით და საჭიროების შემთხვევაში, ამ კატეგორიის ქონება სოციალური მიზნებისთვის მხოლოდ საქველმოქმედო ორგანიზაციებს, ასევე, ბავშვთა სახლებსა და სახელმწიფო ზრუნვის სააგენტოში შემავალ სხვა დაწესებულებებს გადასცეს.
უწყებათაშორისი კომისიის ინფორმაციით, საკითხის შესწავლის შედეგად გაირკვა, რომ ფინანსთა სამინისტროს მომსახურების სააგენტომ რუსთავის მერიას უსასყიდლოდ გადასცა კარტოფილი, რომელიც საბიუჯეტო დავალიანების გამო ერთ-ერთ ორგანიზაციას ჩამოერთვა. თავის მხრივ, რუსთავის მერიამ ფინანსთა სამინისტროსგან მიღებული პროდუქტი სოციალურად დაუცველ მოსახლეობას დაურიგა. ამდენად, კომიისვე ინფორმაციით, აღნიშნული სოციალური აქცია არც სახელმწიფო და არც ადგილობრივი ბიუჯეტიდან მიზნობრივი თანხების გამოყოფას არ უკავშირდება.
როგორც აღნიშნულ ინფორმაციაშია ნათქვამი, ფინანსთა სამინისტრო ჩამორთმეული უკანონო ქონებით, მათ შორის, მალფუჭებადი პროდუქტით, სოციალურად დაუცველი მოსახლეობის უზრუნველყოფას ადგილობრივი თვითმმართველობებისა და სხვა ორგანიზაციების მეშვეობით ადრეც ახორციელებდა.
„ფინანსთა სამინისტროს მომსახურების სააგენტო ქონების უსასყიდლოდ გადაცემას ,,სახელმწიფო ქონების შესახებ საქართველოს კანონის’’ 27-ე მუხლის მე-4 პუნქტის შესაბამისად ახორციელებს. კანონის თანახმად, „სახელმწიფოს საკუთრებაში მიქცეული მოძრავი ქონება შეიძლება, საქართველოს ფინანსთა სამინისტროსთან შეთანხმებით, გადაეცეს სახელმწიფო და ადგილობრივი თვითმმართველობის ორგანოებს, ასევე სხვა დაწესებულებებსა და ორგანიზაციებს. სახელმწიფოს საკუთრებაში მიქცეული მოძრავი ქონება, სახეობის გათვალისწინებით, შეიძლება აგრეთვე გამოყენებულ იქნეს სოციალური მიზნებისთვის“- ნათქვამია უწყებათაშორისი კომისიის განცხადებაში.