კულტურული მემკვიდრეობის დაცვის ეროვნული სააგენტოსა და საპატრიარქოს ხუროთმოძღვრების, ხელოვნებისა და რესტავრაციის  სამეცნიერო საბჭოს წარმომადგენელთა შეხვედრა დღეს, საქართველოს საპატრიარქოში გაიმართა.
როგორც საპატრიარქოს მიერ გავრცელებულ განცხადებაშია ნათქვამი, შეხვედრაზე ბაგრატის ტაძართან დაკავშირებულ საკითხებზე იმსჯელეს.
„აღინიშნა, რომ ეკლესიისთვის ისევე, როგორც სახელმწიფოსთვის, ტაძრის აღდგენას განსაკუთრებული მნიშვნელობა აქვს, რადგან ის გაერთიანებული საქართველოს სიმბოლოა“- ნათქვამია განცხადებაში.
შეხვედრაზე საპატრიარქოს საბჭოს წარმომადგენლებმა კიდევ ერთხელ დააფიქსირეს პოზიცია იმის შესახებ, რომ აუცილებელია ტაძრის დასავლეთ მკლავში მიმდინარე სამუშაოების შეჩერება, რაც კათოლიკოს-პატრიარქის ბრძანებაშიც არის აღნიშნული, თუმცა, ეს არ გულისხმობს კომპლექსის დანარჩენ ნაწილში სამუშაოების შეწყვეტას.
როგორც „ნიუსპრესს“ საპატრიარქოდან აცნობეს, საბჭომ ტაძრის დასავლეთ მკლავში ბოლო დროს დამონტაჟებული ლითონის კონსტრუქციების დაშლისა და ადრე შეთანხმებული პროექტის მიხედვით მისი აღდგენის შესახებ საკითხი დასვა.
„ეროვნული სააგენტოს წარმომადგენლებმა კულტურისა და ძეგლთა დაცვის სამინისტროსთან ერთად შეჯერებული პოზიციის წარმოდგენისთვის დრო ითხოვეს“- განაცხადეს საპატრიარქოში და აღნიშნეს, რომ უახლოეს მომავალში შემდგომი შეხვედრა გაიმართება და შედეგი საზოგადოებას ეცნობება.
ბაგრატის ტაძრის სარეკონსტრუციო სამუშაოები პატრიარქის მოთხოვნით დროებით შეჩერებულია.