გაერო-ს ინიციატივით, მსოფლიო 20 ივნისს ლტოლვილთა საერთაშორისო დღეს აღინიშნავს. ეს დღე ტრადიციულად საქართველოშიც აღინიშნება.

ლტოლვილთა საერთაშორისო დღესთან დაკავშირებით, დღეისთვის დაგეგმილი ღონისძიებების უმრავლესობა შიდა ქართლში გაიმართება.
ოკუპირებული ტერიტორიებიდან დევნილთა, ლტოლვილთა და განსახლების მინისტრი კობა სუბელიანი, შიდა ქართლის რეგიონის გუბერნატორი გიორგი ტატიშვილი და საქართველოში გაერო-ს ლტოლვილთა უმაღლესი კომისარიატის წარმომადგენელი სიმონე ვოლკენი, მსოფლიო ლტოლვილთა დღესთან დაკავშირებით, გორში გამართულ ღონისძიებებში მიიღებენ მონაწილეობას.
ადგილობრივი და დევნილი ბავშვები მხატვარ დავით ბაძაღუასთან ერთად, გორში, „ახალბაღის პარკში“ კედელს მოხატავენ თემაზე „ღირსეული ცხოვრება - ღირსეული დაბრუნების მოლოდინში“.
პარალელურად გაიმართება საფეხბურთო მატჩი შიდა ქართლის დევნილთა ცხრა დასახლებას შორის, ასევე, მოეწყობა დევნილთა ხელნაკეთი ნივთების გამოფენა-გაყიდვა.
„ახალბაღის პარკში“ გაიხსნა ფოტო-გამოფენა, სადაც გურამ წიბახაშვილის მიერ გადაღებული აფხაზეთიდან და სამხრეთ ოსეთიდან დევნილთა ფოტოები იქნება წარმოდგენილი.
გორში ღონისძიებები კონცერტით დასრულდება, სადაც მსმენელებისთვის „ჯეოსტარის“ გამარჯვებულები და ადგილობრივი მუნიციპალიტეტის კულტურის ცენტრის მუსიკალური ჯგუფები შეასრულებენ.
დღესვე პანკისის ხეობაში, დუისში, სადაც ჩეჩნეთიდან ლტოლვილები არიან განსახლებული, ბავშვებს შორის ჭიდაობაში, ჭადრაკსა და ფეხბურთში ჩემპიონატი ჩატარდება, ასევე, გაიმართება დოღი, ლტოლვილთა ხელნაკეთი ნივთების გამოფენა-გაყიდვა და კონცერტი ადგილობრივი ანსამბლების მონაწილეობით.
დუისში ღონისძიებებს საქართველოში გაერო-ს ლტოლვილთა უმაღლესი კომისარიატის წარმომადგენლის მოადგილე კრისტოფ ბირვირტი დაესწრება.
20 ივნისი - ლტოლვილთა საერთაშიროსო დღე 2000 წლიდან აღინიშნება. დღეისთვის მსოფლიოში 33 მილიონი ლტოლვილია.