საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრომ დევნილებს მათი პრობლემების მოსაგვარებლად ერთკვირიანი ვადა სთხოვა.
აფხაზეთიდან და ცხინვალის რეგიონიდან დევნილი მოქალაქეები დღეს სამინისტროსთან გამართულ საპროტესტო აქციაზე შიმშილობის დაწყებას გეგმავდნენ.
როგორც აქციის ორგანიზატორი პარტია „მომავალი საქართველოს“ ლიდერმა გიორგი ლაღიძემ „ნიუსპრესს“ განუცხადა, დევნილები სახელმწიფოსგან თავშესაფარს ითხოვენ. მათ ამ პრობლემის მოგვარების თხოვნით, სამინისტროს არაერთხელ მიმართეს. თუმცა, მისი თქმით, ნაცვლად დახმარებისა, სამინისტროს ჩინოვნიკებისგან ფიზიკური და სიტყვიერ შეურაცხყოფა მიიღეს.
„ამიტომ, მათ დღეს კარვის გაშლა და შიმშილობის დაწყება გადაწყვიტეს. თუმცა, მოვახერხეთ სამინისტროში ავედით და დეპარტამენტის ხელმძღვანელებსა და მინისტრის მოადგილეს კობა გორგოძეს შევხვდით“- განუცხადა „ნიუსპრესს“ სამინისტროდან გამოსვლის შემდეგ ლაღიძემ.
მისი თქმით, სამინისტროს წარმომადგენლებმა დევნილთა პრობლემებში გასარკვევად და მათ მოსაგვარებლად ერთკვირიანი ვადა ითხოვეს.
„შიმშილობა მომავალ სამშაბათამდე გადავდეთ. სამინისტროს ერთი კვირა მივეცით იმისთვის, რომ დევნილთა პრობლემები გადაწყვიტოს. ეს საკმარისი ვადაა“- განაცხადა ლაღიძემ და დასძინა, რომ თუ ერთ კვირაში მოთხოვნა არ დაკმაყოფილდება, მომავალ სამშაბათს, სამინისტროსთან კარვები გაიშლება, დევნილები უვადო შიმშილობას დაიწყებენ და მინისტრის გადადგომას მოითხოვენ.