თბილისის დამისამართების პროექტის ფარგლებში უკვე დასრულდა ძველი თბილისის რაიონის ინვენტარიზაცია.  საქართველოს იუსტიციის სამინისტროს საჯარო რეესტრის პრესსამსახურის ინფორმაციით, ძველი თბილისის რაიონის გამგეობას ინვენტარიზაციის შედეგად მოპოვებული მონაცემები უკვე გადაეცა.
მტკვრის მარცხენა სანაპიროს დასრულებული არეალის ელექტრონული რუკა, სქემატური ნახაზები და გეომონაცემთა ბაზა ძველი თბილისის რაიონის გამგეობის წარმომადგენლებს დღეს იუსტიციის სამინისტროს საჯარო რეესტრის თავმჯდომარემ -სოსო წიქარიშვილმა გადასცა.
იუსტიციის სამინისტროს საჯარო რეესტრის ინფორმაციით, თავდაპირველად ძველი თბილისის რაიონის და ქალაქის ცენტრალური ნაწილის ინვენტარიზაცია დაიგეგმა, ვინაიდან უმისამართო ბინების პრობლემა იტალიური ეზოების გამო, ძირითადად თბილისის ძველ უბნებში იყო.
ინვენტარიზაციის ფარგლებში სამისამართო ბაზა შეივსო სხვადასხვა მონაცემებით - ქუჩის მიმართულება, დასახელება, შენობის შიგნით ფართობების დანიშნულება, ყველა კონკრეტულ ბინას მიება ინფორმაცია კომუნალური მომსახურების აბონენტის ნომრის, მობინადრეების შესახებ და სხვ.
ინვენტარიზაციის სრულად დასრულების შემდეგ სამოქალაქო რეესტრის სააგენტო ახლადშექმნილ მისამართებზე არსებულ საცხოვრებლებში რეგისტრირებულ პირთა იდენტიფიცირებას გეგმავს.