საქართველოს ახალგაზრდა იურისტთა ასოციაცია აუცილებლად მიიჩნევს იმ საკანონმდებლო ცვლილების განხორციელებას, რომელიც must carry-ს წესების შემოღებას ითვალისწინებს.

ამის შესახებ საიას ხელმძღვანელებმა „თბილისი მარიოტში“ განაცხადეს, სადაც მათ საერთაშორისო ორგანიზაციებისა და არასამთავრობო სექტორის წარმომადგენლებს, ექსპერტებს და სხვა დაინტერესებულ პირებს must carry-ს საკითხებთან დაკავშირებული კვლევა წარუდგინეს.

,,ქართული მედია აძლიერებს დემოკრატიას, ანგარიშვალდებულებას და მოქალაქეთა ინფორმირებულობას“ პროექტის კოორდინატორის ნათია კაპანაძის განცხადებით, must carry მსოფლიოს სხვადასხვა ქვეყანაში, მათ შორის, აშშ-ში დიდი ხანია დამკვიდრებულია და გულისხმობს საკაბელო ტელევიზიის ვალდებულებას - გაატაროს გარკვეულ სამაუწყებლო კომპანიათა სატელევიზიო სიგნალები რათა, ამ ქსელის აბონენტებს სხვა პროგრამების ნახვის საშუალებაც ჰქონდეთ.

მისი თქმით, აღნიშნული წესების შემოღების შემთხვევაში, ტელეკომპანია „მაესტროს“, „მე-9 არხსა“ და „კავკასიას“ შესაძლებლობა ექნება საკაბელო მაუწყებლებზე მოხვდნენ.

შესაბამისი კანონპროექტი კამპანია ,,ეს შენ გეხებას“ ფარგლებში პარლამენტს უკვე წარედგინა. ავტორების შეფასებით, საკანონმდებლო შეთავაზების მიზანი საკაბელო ქსელების აბონენტების ინფორმაციის ალტერნატიული საშუალებებით უზრუნველყოფაა.

,,რამდენადაა მზად პარლამენტი აღნიშნული წინადადებების განსახილველად მომავალი გვიჩვენებს. რაც შეეხება must carry-ს წესების ქართულ კანონმდებლობაში დამკვიდრების საკითხს, როგორც კვლევამ აჩვენა თუ ის კარგად შემუშავებული და დაბალანსებულია საკმაოდ სიცოცხლისუნარიანია“-განაცხადა კაპანაძემ.

პროექტის ავტორები მიიჩნევენ, რომ სამაუწყებლო მედიის ბაზარზე პლურალიზმისა და მრავალფეროვნების უზრუნველყოფის მიზნით, საქართველო ვალდებულია must carry-ს წესები შემოიღოს, რაც ბაზარზე მოთამაშეებსა და მომხმარებლის ინტერესებს შორის სამართლიან ბალანსს დაამკვიდრებს.