"დევნილი სამოქალაქო საზოგადოების კოალიციამ" ტაშკენტის ქუჩაზე დღეს აქცია გამართა. აქციაზე ტაშკენტის #7-ში მდებარე შენობიდან გასულ წელს გამოსახლებული  დევნილები და კოალიციის წევრები სახელმწიფო უწყებების მხრიდან განმარტებებს ითხოვდნენ.
კოალიციის წარმომადგენლების თქმით, სამინისტროს ცხელი ხაზი იუწყება, რომ ეს შენობა არ არის დევნილებისთვის განკუთვნილი და სამინისტროს ბალანსზე არაა, თუმცა მათივე თქმით, არსებობს სანდო წყაროს მიერ მიწოდებული ინფორმაცია და ფაქტები იმის შესახებ, რომ ეს შენობა სწორედ დევნილებისთვის გარემონტდა.
დღესვე აქციის მონაწილეებმა დევნილთა და განსახლების სამინისტროს წერილობითი მიმართვა გაუგზავნეს.
"ჩვენ გვაინტერესებს რატომ გამოასახლა სამინისტრომ ამ შენობიდან შარშან დევნილები, რომლებიც დღემდე ქუჩაში არიან და ქირით ცხოვრობენ ან რატომ არ არის ეს პროცესი გამჭვირვალე და რა კრიტერიუმებით არჩევს სამინისტრო ადამიანებს" - აცხადებენ "დევნილი სამოქალაქო საზოგადოების" წარმომადგენლები.
როგორც "ნიუსპრესს" კოალიციიდან აცნობეს, იმ შემთხვევაში თუ დევნილებს ლტოლვილთა სამინისტრო განმარტებებს არ მისცემს, აქციებს უკვე კობა სუბელიანის გადადგომის მოთხოვნით გამართავენ.