„ეკოლოგიური სამართლის ცენტრის“ ხელმძღვანელი ნიკოლოზ მჟავანაძე გარემოს დაცვის სამინიტროს და მთავარ პროკურატურას ცენტრის მიერ გადაგზავნილ მასალებზე რეაგირებისკენ მოუწოდებს.
როგორც მჟავანაძემ დღეს გამართულ ბრიფინგზე აღნიშნა, ორი თვე გავიდა მას შემდეგ, რაც ზესტაფონის ფეროშენადნობთა ქარხნიდან ჰაერში მავნე ნივთიერებები გაიფრქვა, რომლის შედეგადაც თანამშრომლები და მოსახლეობა დაშავდნენ, იყოს მსხვერპლიც.
მისი თქმით, „ეკოლოგიური სამართლის ცენტრმა“ საწარმოს მიერ სისხლის სამართლის კოდექსის 295-მუხლის მესამე პუნქტით „ატმოსფერული ჰაერის დაბინძურება“ გათვალისწინებული დანაშაულის გამო, მასალები გარემოს დაცვისა და ენერგეტიკის სამინიტროებს და მთავარ პროკურატურაში გადაგზავნა, მაგრამ მათგან რეაგირება არ ყოფილა.
„უფრო მეტიც, საწარმოს მიერ კვლავ გრძელდება მოსახლეობის მოწამვლა მავნე ნივთიერებებით, რისი დასტურიც 4 ივნისს მომხდარი ფაქტიც გამოდგება, როცა მთელი ქალაქი კვამლში მოექცა“ - აღნიშნა მჟავანაძემ.
მისი თქმით, ადგილობრივი მუნიციპალიტეტის ხელმძღვანელები სამასახურიდან იმ მოქალაქეებს ათავისუფლებენ, ვინც ქარხნის მიმართ პრეტენზიას გამოთქვამს.
„მართალია, „ჯორჯიან მანგანუმ ლიმითედის” მესვეურები აცხადებენ, რომ ღუმელებზე ფილტრები დააყენეს, მაგრამ არცერთ სახელმწიფო სტრუქტურას ეს ფილტრები არ შეუმოწმებია, აკმაყოფილებენ თუ არა ისინი შესაბამის მოთხოვნებს“ - განაცხადა ნიკოლოზ მჟავანაძემ.
მისივე ინფორმაციით, არასერტიფიცირებული მარგანეცის მადნის გადამუშავება კვლავ გრძელდება და ზესტაფონის მოსახლეობა ისევ საფრთხის ქვეშაა.
ზესტაფონის ტელეკომპანია „არგოს’’ ყოფილი ჟურნალისტის შოთა ფერაძის ინფორმაციით, ზესტაფონის ფეროშენადნობთა ქარხნიდან გარემოში დიდი რაოდენობით მავნე ნივთიერებების გაფრქვევა 14 აპრილს მოხდა.
„ეკოლოგიური სამართლის ცენტრის“ ხელმძღვანელის ინფორმაციით კი, აღნიშნულის შედეგად, დაზიანებული საამქროს რამდენიმე მუშა საავადმყოფოში გადაიყვანეს. მე-4 საამქროს ხიდური მემანქანე გოჩა სამხარაძე კი, მავნე ნივთიერებების გაფრქვევის დროს ინტოქსიკაციით გარდაიცვალა.