„მწვანეთა პარტია“ საერთაშორისო სადამკვირვებლო მისიებისგან წინასაარჩევნო გარემოს მდგომარეობის შეფასებას და საზოგადოებისთვის გაცნობას მოითხოვს.
როგორც „ნიუსპრესს“ „მწვანეთა პარტიიდან“ აცნობეს, ანგარიშები წინასაარჩევნო კამპანიების მონიტორინგის განხორციელებასა და არსებულ დარღვევებზე ადექვატური რეაგირების საშუალებას გაზრდის.
პარტიის ინფორმაციით, 2012 წლის საპარლამენტო არჩევნებისადმი სახეზეა საერთაშორისო ორგანიზაციების და საქართველოს საზოგადოების მხრიდან უპრეცენდენტოდ გაზრდილი ინტერესი და მაღალი აქტივობა.
„ამასთან, საზოგადოებაში საარჩევნო პროცესებისადმი უნდობლობის დონე ჯერ კიდევ საკმაოდ მაღალია, რასაც არჩვენების გაყალბებასა და საარჩევნო კანონმდებლობის რადიკალურ გაუარესებასთან ერთად ხელს უწყობს ხელისუფლების მიერ რეალურ ოპოზიციასა და მათ მხარდამჭერებზე ტოტალური ტერორი“- აცხადებენ პარტიაში.
მათი ინფორმაციით, წელს პირველი შემთხვევაა, როცა განსაკუთრებული აქცენტი კეთდება არა მარტო არჩევნების დღეს გაყალბების თავიდან აცილებაზე, არამედ წინასაარჩევნო პერიოდში ხელისუფლების მხრიდან ძალადობასა და მანიპულაციების გამორიცხვასა და ზეწოლისგან თავისუფალი ამომრჩევლის ნების გამოხატვისთვის გარემოს შექმნაზე.
„მწვანეთა პარტიის“ წარმომადგენლების თქმით, ეს კიდევ ერთხელ დადასტურდა საქართველოში აშშ-ს სახელმწიფო მდივნის ჰილარი კლინტონის ოფიციალური ვიზიტისას, რომელმაც საქართველოს პოლიტიკურ ლიდერებს კონკურენტუნარიანი და სამართლიანი წინასაარჩევნო გარემოს უზრუნველყოფისკენ მოუწოდა.