ზუგდიდის ბოტანიკურ ბაღში ხეების მასობრივ ჭრასთან დაკავშირებით საქართველოს შინაგან საქმეთა სამინისტროში გამოძიება იწყება. ამის შესახებ ინფორმაციას „ეკოლოგიური სამართლის ცენტრი“ ავრცელებს.
ცენტრის განმარტებით, 11 მაისს საქართველოს მთავარ პროკურატურას მათ მასალები გადაუგზავნეს, რომელიც კულტურული მემკვიდრეობის ძეგლის სტატუსის მქონე ზუგდიდის ბოტანიკურ ბაღში ველოტრასის მშენებლობასა და ასეულობით უნიკალური ჯიშის წითელ წიგნში შესული ხეების ჭრას უკავშირდება.
,,ეკოლოგიური სამართლის ცენტრს’’ პროკურატურიდან დღეს აცნობეს, რომ მასალები სათანადო რეაგირებისთვის ზუგდიდის შს სამმართველოს გადაეგზავნა.
,,ველოტრასის მშენებლობის პროექტი უნდა შეთანხმებულიყო კულტურული მემკვიდრეობის ეროვნულ სააგენტოსთან, სადაც სპეციალური საბჭო განიხილავდა მშენებლობისა თუ რეკონსტრუქციული სამუშაოების მიზანშეწონილობას და მხოლოდ ამის შემდეგ სააგენტოს ნებართვების სამსახური გასცემდა ნებართვას მშენებლობაზე ან ობიექტის რეკონსტრუქციაზე“- განაცხადა ,,ეკოლოგიური სამართლის ცენტრის’’ თავმჯდომარემ ნიკოლოზ მჟავანაძემ და დასძინა, რომ მოცემულ შემთხვევაში პროექტს არც ერთი აღნიშნული სტადია არ გაუვლია.
„ეკოლოგირი სამართლის ცენტრი“ ზუგდიდის ბოტანიკურ ბაღში მიმდინარე სამუშაოებს კულტურული მემკვიდრეობის ძეგლის განადგურების ფაქტად აფასებს, რაც საქართველოს სისხლის სამართლის კოდექსის 2592 მუხლით გათვალისწინებული დანაშაულია.
ცენტრი იმედოვნებს, რომ გამოძიება ობიექტურად წარიმართება და დამნაშავეების პასუხისმგებლობის საკითხი დადგება.