საქართველოს ხელისუფლებას არ შეეძლო „იუნესკოს“ რეკომენდაციის გათვალისწინება, რომლის თანახმად, ბაგრატის ტაძრის რესტავრაცია 2014 წლისთვის უნდა დაწყებულიყო. ამის შესახებ დღეს კულტურისა და ძეგლთა დაცვის მინისტრმა ნიკა რურუამ განაცხადა.

ამით იგი „იუნესკოს“ წარმომადგენლობის განცხადებას გამოეხმაურა, რომლის თანახმად, ბაგრატის ტაძარი ჯერაც საფრთხის ქვეშ მყოფი ძეგლების ნუსხაშია.

რურუას განმარტებით, „იუნესკოს“ წარმომადგენლები აცხადებდნენ, რომ 2013 წლამდე ბაგრატის ტაძრის შესწავლა უნდა მომხდარიყო, ხოლო რესტავრაცია 2014 წლისთვის უნდა დაწყებულიყო.

რურუას თქმით, საქართველოს ხელისუფლება 2014 წლამდე ვერ მოიცდიდა. ვინაიდან, ძლიერი დაზიანებების გამო, ტაძარი ნგრევის რისკის ქვეშ იყო.

,,თავის დროზე, ბაგრატის რესტავრაცია ორჯერ განხორციელდა. ამიტომ ის, მიწისძვრის მიმართ მგრძნობიარე იყო“ - განაცხადა რურუამ.

მისივე თქმით, ტაძრის რესტავრაციის პროცესი ამჟამადაც მიმდინარეობს და მას თავად „იუნესკოს“ მიერ რეკომენდებული სპეციალისტები ხელმძღვანელობენ, მათ შორისაა იტალიელი არქიტექტორი ანდრია ბრუნო, რომელიც მინისტრის შეფასებით, ტაძრების აღდგენის ერთ-ერთი თვალსაჩინო პროფესიონალია.

,,ბაგრატის ტაძარს სულ მალე დასრულებული სახით ვიხილავთ. არც მიწისძვრა და არც ფორსმაჟორული სიტუაციები არქიტექტურის ამ მარგალიტისთვის საშიში აღარ იქნება“-განაცხადა რურუამ.

მისივე თქმით, ტაძრის მაკეტები, რომლის ფოტოებიც სოციალურ ქსელებში ვრცელდება, ყალბია და სინამდვილეს არ შეესაბამება.